Protagonisti

Poezi nga Atdhe Geci

Dje e mundëm një fushë mbushur me
varre, e mundëm një kohë të burgjeve
e pushkatimeve, e mundëm një vrasës
të lirisë dhe të gjenocidit, e mundëm,
një pushtues, që vrasjen kishte mësim.

Nuk e mbaj më ngarkesën e shekujve
nuk e mbajnë më as idealistët e vendit
na duhet një forcë që i prinë atdheut.

Kosova dardane e do emrin e tokës së
vetë, një kërkesë të tillë e ka Çamëria,
Ilirida, Krahina e Mollës së Gjakut,
Ulqini, Shkupi, Tetova dhe Gostivari.

Nuk e mbaj më ngarkesën e shekujve
thotë ai që jetën po edhe vdekjen e do
të bukur, dhe, lirinë e do të shkruar.

Kosovë, edhe nëpër udhë të ngushta
ti di të jesh Kapiteni i fatit të Atdheut
se gjithçka nis nga fjala e bërja fjalës
gjithçka nis nga mendja dhe mendimi
gjithçka nis nga zemra dhe duart tona.

Heshtja për të harruar vendlindjen e
atdheut, Çamërinë, është e pafalshme
çfarëdo që të jetë udha kombi sot e do
kapitenin e vetë kundër tëra stuhive!…

Atdhe Geci