Promovohet strategjia për zhvillim kulturor të Gjilanit 2012-2016

Gjilan – Drejtoria për Rini, Kulturë dhe Sport në bashkëpunim me Teatrin ODA ne lokalet e teatrit të qytetit kanë promovuar Strategjinë për zhvillim kulturor të Komunës së Gjilanit në prani të një numri të dashamirësve të kulturës.

Floren Mehmeti nga Teatri ODA me këtë rast theksoi se krijimi i Strategjisë për Zhvillimin Kulturor të Komunës së Gjilanit është pjesë e projektit trevjeçar. “ Kultura për të gjithë dhe nga të gjithë” të implementuar nga Teatri “ ODA”- Prishtinë dhe Kuvendi i Komunës së Gjilanit.

Ai më tej falënderoi të gjithë akterët dhe në veçanti institucionet komunale për kontributin e dhënë gjatë përpilimit të këtij dokumenti.

Veton Nevzadi, Drejtor për Rini, Kulturë dhe Sport i Komunës së Gjilanit theksoi se krijimi i kësaj strategjie dhe miratimi nga Kuvendi Komunal është një model i mirë edhe për komunat tjera se si duhet të organizohen punët në këtë sektor. “Kjo strategji kulturore do t’i shërbejë Komunës së Gjilanit në orientimin e saj kulturor dhe në implemetimin e prioriteteve që jepen nga kjo strategji” ka thënë Nevzadi.

Nevzadi me tej shtoi se krijimi i kësaj strategjie tregon seriozitetin e qasjes se institucioneve lokale komunale në raport me planifikimin e mirë të punëve, pasiqë shoqëritë e disiplinuara dhe të organizuara e dinë mirë rrugën nga do të shkojnë./rajonipress/