Promovohen “Dy drama” të Ragip Sylajt

Prishtinë – “Dëbimi nga parajsa” është ndërtuar në historinë e vjetër të mëkatit, ndërsa “Vetëkryqëzimi” është e njëjta histori, me protagonistë të bazuar në Adamin e Evën, por në version të ditëve të sotme. Të dyja këto drama të autorit Ragip Syla. Libri i tij, i pagëzuar “Dy drama”, është përuruar të enjten, në qendrën “Multimedia”. Në ceremoninë e organizuar nga Klubi i Shkrimtarëve të Kosovës, dramaturgë e kritikë letrarë, kanë zbërthyer tematikën e tyre

“Teksti i parë ‘Dëbimi nga parajsa’, siç përkufizohet edhe nga vetë autori, është një tragjikomedi në dy pjesë, përkatësisht në dhjetë pamje, që niset me një prolog e bitiset me një epilog. Ndërsa teksti i dytë, ‘Vetëkryqëzimi’ është një dramë, rrëfimi i së cilës shtrihet në pesë pamje skenike”, ka thënë dramaturgu dhe kritiku Arian Krasniqi. Ai ka përmendur edhe emëruesin e përbashkët të të dy teksteve.

“Këto dy tekste dramatike të Ragip Sylajt janë provokuese dhe mund ta ngjallin kërshërinë dhe interesin e regjisorëve për ndonjë inskenim eventual të tyre. Me fjalë tjera, vepra dramatike e Sylajt vetëm sa na e begaton skenën tonë, edhe ashtu të varfër, në dramë dhe teatër”, ka thënë Krasniqi.

Studiuesi Adil Olluri ka thënë se “Dy dramat” përshkohen nga stili i dramës së absurdit.

“Libri i Ragip Sylajt është një parabolë, dhe duke qenë se arti dramatik është një art mimetik, art i imitimit, libri mund të përkufizohet edhe si një parabolë mimetike, ngaqë duke na shëtitur nëpër motive të religjionit, motive spirtuale e biblike, ai na flet për aktualitetin e papërballueshëm të qenies, ekzistenca e së cilës sfidohet nga problemet e përditshmërisë, që janë më të mëdha e më shkatërruese për të sesa ndëshkimet eternale e biblike”, ka thënë Olluri.

Për Ardian Haxhajn, të dyja dramat e Sylajt, e përmbajnë një formë ceremoniale të deklarimit të ideve.

“Si të tilla dramat e Sylajt kërkojnë një qasje regjisoriale dramatike më të veçantë, çka e bëjnë më të veçantë edhe shijen estetike të shikuesve. Ky ceremonalitet dramaturgjik do të ishte një sihariq për dashamirësit e skenës së teatrit në Kosovës, ku përmes dramatizimit të dy dramave të lartpërmendura do të mbërrihej efekti i katarsisit estetik”, ka thënë Haxhaj.

Ragip Sylaj, prozator, poet dhe gazetar kulture, në ceremoninë e përurimit të veprës “Dy drama” nuk ka dashur ta komentojë librin. Gjithçka ka folur ai, kanë qenë pak fjalë për procesin e shkrimit.

“Procesi i shkrimit ka dimension irreal dhe të ngjan me ëndrrën”, ka thënë ai.