Prokuroria në Gjilan ndalon shtatë persona për drogë, dhunë në familje dhe lëndime trupore

Gjilan – Prokuroria Themelore në Gjilan ka bërë të ditur se, me urdhër të prokurorit të shtetit, gjatë 24 orëve të fundit janë ndaluar shtatë persona në tri raste të ndara, ndërsa është ngritur edhe një aktakuzë për veprën penale “Kanosje”.

Sipas njoftimit zyrtar, një person është ndaluar për veprën penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge”, ndërsa një tjetër për “Posedim të paautorizuar të narkotikëve, substancave psikotrope ose analoge”.

Po ashtu, tre persona janë ndaluar për veprën penale “Lëndim i lehtë trupor”, ndërsa dy persona të tjerë janë ndaluar për “Dhunë në familje”, sipas Kodit Penal të Kosovës.

Prokuroria ka bërë të ditur se të gjithë të dyshuarit janë ndaluar për 48 orë, me qëllim të zhvillimit të procedurave të mëtejshme hetimore.

Ndërkohë, Prokuroria Themelore në Gjilan ka ngritur edhe një aktakuzë ndaj një personi për veprën penale “Kanosje”.

Autoritetet e drejtësisë kanë theksuar se do të vazhdojnë trajtimin me prioritet të rasteve që lidhen me dhunën, narkotikët dhe veprat tjera penale që cenojnë sigurinë publike./rajonipress/