Prokuroria e Gjilanit ngre 14 aktakuza për vepra të ndryshme penale, dominojnë rastet e dhunës në familje

Gjilan – Prokuroria Themelore në Gjilan ka njoftuar se gjatë 24-orëve të fundit ka ngritur katërmbëdhjetë (14) aktakuza kundër katërmbëdhjetë (14) personave për vepra të ndryshme penale, që përfshijnë dhunën në familje, vjedhjet, sulmet fizike dhe shmangien e detyrimeve doganore.

Sipas njoftimit zyrtar të Prokurorisë, katër aktakuza janë ngritur për veprën penale “Dhuna në familje”, duke e bërë këtë kategorinë më të shpeshtë të rasteve të proceduara gjatë kësaj periudhe. Institucionet e drejtësisë vazhdojnë të theksojnë nevojën për raportim dhe trajtim të menjëhershëm të rasteve që cenojnë sigurinë dhe integritetin familjar.

Po ashtu, janë ngritur dy aktakuza për veprën penale “Vjedhje”, si dhe dy të tjera për “Vjedhje të shërbimeve”, raste që lidhen kryesisht me përfitime të kundërligjshme dhe dëmtim të pasurisë.

Në mesin e aktakuzave të ngritura janë edhe dy raste për “Lëndim të lehtë trupor”, një aktakuzë për “Rrezikim të trafikut publik”, një për “Lajmërim apo kallëzim të rremë”, si dhe një tjetër për veprën penale “Sulmi”.

Ndërkaq, Prokuroria ka proceduar edhe një rast për veprën penale “Shmangia nga pagesa e tarifave të detyrueshme doganore ose tarifave akcizore”, që lidhet me shkelje në fushën ekonomike dhe fiskale.

Prokuroria Themelore në Gjilan ka bërë të ditur se mbetet e përkushtuar në luftimin e kriminalitetit dhe trajtimin me prioritet të të gjitha rasteve që bien ndesh me ligjin, duke bashkëpunuar ngushtë me organet e rendit dhe institucionet tjera të drejtësisë./rajonipress/