Prokuroria e Gjilanit në përfundim të hetimeve ndaj Naser Korçës dhe Valon Shefkiut

Gjilan – Prokuroria Themelore e Gjilanit departamenti për krime të rënda është në përfundim të hetimeve kundër dy zyrtarëve të lartë të komunës së Gjilanit, Naser Korça drejtor i shërbimeve publike dhe Valon Shefkiu shef në sektorin e urbanizmit për veprën penale “keqpërdorim i pozitës apo autoritetit zyrtar”.

Prokuroria Themelore e Gjilanit është në përfundim të hetimeve edhe ndaj dy zyrtarëve të lartë të komunës së Gjilanit. Se janë duke u zhvilluar hetime këtë e ka konfirmuar për rajonipress edhe kryeprokurori Jetish Maloku.

Në aktvendimin për zhvillimin e hetimeve kundër Naser Korçës thuhet se gjatë periudhës 21.11.2016 në cilësinë e personit zyrtar i cili duke shfrytëzuar detyrën apo autoritetin zyrtar i ka tejkaluar kompetencat e tij ose nuk i ka përmbush detyrat zyrtare me qëllim që të përfitojë çfarëdo dobie, për vete ose për personin tjetër, apo të shkaktojë dëm personit tjetër ose seriozisht t`i shkel të drejtat e personit tjetër, në atë mënyrë që ka lejuar të operojë në disa biznese hoteliere në mënyrë të kundërligjshme.

Edhe, Valon Shefkiu dyshohet se nuk i ka respektuar vendimet e nxjerra edhe pse me ligj ka qenë i obliguar që t`i ekzekutojë lidhur me rrënimin e disa platove montuese të cilat gjenden tek zona qendër si dhe lokaleve tjera të ngritura në qytet pa leje, me qëllim që këto hapësira të lirohen, të ngritura pa leje të organeve kompetente, edhe pse me dije i njëjti nuk ka ndërmarrë veprime në kuadër të autorizimeve ligjore.

Sipas burimeve nga prokuroria e Gjilanit shumë shpejt pritet që të zyrtarizohen aktakuzat ndaj këtyre dy zyrtarëve komunal./rajonipress/