Prokuroria dhe policia koordinohen për të luftuar të gjitha llojet e veprave penale

Gjilan – Në zyrën e Kryeprokurorit të Prokurorisë Themelore në Gjilan e cila mbulon shtatë komuna të Anamoraves janë takuar të gjithë udhëheqësit e sektorëve të hetimeve të komunave Gjilan, Viti, Kamenicë dhe Novobërdë të udhëhequr nga drejtori i hetimeve regjionale Avni Oruqi. Vetëm bashkëpunimi dhe koordinimi i vërtetë në mes këtyre institucioneve garanton suksesin në luftën kundër të gjitha llojeve të veprave penale tha Jetish Maloku.

Jetish Maloku kryeprokuror i Prokurorisë Themelore në Gjilan tha për rajonipress se nuk ka dyshim se kjo prokurori bashkë me të gjithë sektorët e hetimeve brenda policisë për këtë regjion, do jenë shumë të përgatitura në zbatimin e ndryshimeve ligjore në raport me punën e tyre, duke tejkaluar të gjitha pengesat rreth tranzicionit që është bërë me rastin e aplikimit të dispozitave të Kodit të ri të procedurës penale.

Maloku në zyrën e tij ka takuar të gjithë udhëheqësit e sektorëve të hetimeve të komunave Gjilan, Viti, Kamenicë dhe Novobërdë të udhëhequr nga drejtori i hetimeve regjionale Avni Oruqi.

“Vërtet të gjitha dispozitat e të njëjtit kod, dëshmojnë se tani e tutje prokuroria duhet të jetë e kyçur nga fillimi për çdo rast dyshimi apo inicimi të procedurës penale ndaj një kryesi të veprës penale. Pra momenti i parë për njoftimin e fillimit të hetimit do jetë edhe fillimi i njoftimit të prokurorit për rastin, për çka prokurori do jetë pandërprerë i kyçur në rastin e caktuar” ka sqaruar Maloku.

Sipas Malokut edhe për rastet e arrestimit dhe ndalimit prokurori i shtetit do jetë ai i cili nga momenti i arrestimit do e mbuloj policinë me vendim mbi ndalimin dhe arrestimin, jo më vonë se 6 orë nga orët e para të arrestimit. “Tani i gjithë rasti i paraburgimit duhet domosdo të përfundoj brenda afatit 48 orësh, nga momenti i arrestimit . Prokurori i shtetit sipas këtij kodi është i obliguar që brenda 24 orëve të lëshoj vendimin mbi ndalimin apo arrestimin e personit të dyshuar” shtoj Maloku.

Maloku tha se vetëm vendimi i prokurorit është ligjor nëse ai lëshohet brenda afatit jo më vonë se 6 orë nga arrestimi apo ndalimi i të dyshuarit nga policia. “E veçanta e këtij Kodi është edhe afati 24 orësh për të gjithë rastin për hetim dhe paraburgim, qoftë nga policia, qoftë nga prokurori i shtetit, sepse brenda këtij afati domosdo prokurori duhet të bëjë kërkesë për caktim eventual të paraburgimit të këtij dyshuari, dhe komplet dosjen t`ia dorëzoj gjykatës kompetente për vendosje lidhur me paraburgimin. Tani gjykata duhet të vendos edhe ajo brenda afatit prej 24 orësh lidhur me kërkesën e prokurorit të shtetit për paraburgim” ka sqaruar ai.

Në këtë takim sipas Malokut është kërkuar që pandërprerë të jetë në kontakt nga fillimi prokurori i shtetit, kur merret informata nga policia, si është kryer vepra penale, apo si është arrestuar personi. “Vetëm bashkëpunimi dhe koordinimi i vërtetë në mes këtyre institucioneve garanton suksesin në luftën kundër të gjitha llojeve të veprave penale dhe kryesve të tyre i cili bashkëpunim nuk ka munguar edhe deri më tash” tha Maloku./rajonipress/