Programe të larmishme për ditën e çlirimit në Kamenicë

Gjilan – Për nderë të 18 Qershorit- Ditës së Çlirimit të Kamenicës është promovuar libri me poezi të autorit Dan Kosumi, hapja e ekspozitës me artefakte dhe manifestimi qendror.

Kryetari i komunës së Kamenicës, Shaip Surdulli, tha se çlirimi i Kamenicës dhe i gjithë Kosovës ndërlidhet me ndihmën e pakursyer të bashkësisë ndërkombëtare, të Shteteve të Bashkuara të Amerikës dhe të Bashkimit Evropian dhe të veprimit të drejtpërdrejtë nëpërmjet sulmeve ajrore të NATO-s kundër forcave dhe teknologjisë serbe.

“Në këtë kohë, para 14 viteve populli shqiptar ishte në gjendje shumë të keqe. Ishte luftë në mes jetës apo rrezikut të vdekjes. Por, ishte edhe një shpresë që mbështetej te lufta e UÇK-së dhe forcat e NATO-s që vazhdonin me bombardime ndaj forcave serbe. Kjo shpresë e popullit shqiptar u realizua me 12 qershor të vitit 1999 kur hynë trupat tokësore të NATO-s në Kosovë dhe u larguan për gjithmonë forcat okupuese shekullore serbe “ ka thënë Kryetari Surdulli.

Ai tha se edhe në komunën e Kamenicës ka përparime të dukshme, sepse çdo vit po shtohen projekte të reja, po përmirësohet infrastruktura dhe po përmirësohet jeta e qytetarëve. Për këto 14 vitet e kaluara janë bërë mjaft përpjekje dhe është arritur përparim në shumë fusha.

Për përparimin e komunës në përgjithësi i falënderoj të gjithë qytetarët e komunës që kanë punuar dhe po punojnë për të mirën e familjes, lagjes, fshatit, qytetit dhe mbarë Kosovës. Presim që përvjetorët tjerë t’i festojmë me rezultate edhe më të mëdha, me zhvillim të ekonomisë dhe mirëqenie më të mirë për të gjithë qytetarët e komunës sonë.

Në fund për të pranishmit është shfaqur një program me këngë e valle të ndryshme. Manifestimi do të përfundoj me finalen e turnirit në futboll të vogël “ Dardana 2013 “ në fushat sportive të shkollave të mesme./rajonipress/