Prioritet zhvillimi ekonomik

Politikat tregtare, reformat e të bërit biznes, rritja e investimeve të huaja dhe funksionimi i Ministrisë së Tregtisë dhe Industrisë, ishte temë e ligjëratës të zëvendësministres dhe ministres së Tregtisë dhe Industrisë Mimoza Kusari – Lila të hënën në Universitetin Pjetër Budi në Prishtinë.

Ministrja Mimoza Kusari – Lila tha se krijimi i politikave për një ambient më të favorshëm në fushën e Industrisë dhe Tregtisë është misioni i ministrisë që e drejton.

Një ndër temat kryesore gjatë ligjërimit të ministres Kusari-Lila para studentëve të Pjetër Budit ishte zhvillimi ekonomik, i cili sipas saj nuk është, e as nuk do të jetë si rezultat i një vendimi magjik. “Zhvillimi ekonomik i vendit është rezultat i përbashkët i reformave dhe vendimeve në shumë nivele dhe sektorë të cilat së bashku përkthehen në rritje ekonomike. Merrni investimet për shembull: Përvoja e vendeve tjera ka treguar që rritja e investimeve të huaja është rezultat i punës dhe koordinimit disa fusha të ndryshme”, u shpreh ajo.

Duke i ftuar studentët e interesuar të shohin për së afërmi punën e MTI-së, Kusari-Lila tha se studentët duhet të kuptojnë se arsimimi superior i duhur do të jetë faktori më i rëndësishëm për karrierën e tyre. Me gjithë sfidat që vendi është duke u ballafaquar tani, njerëzit e rinj me arsimim superior janë një ndër sfidat më të mëdha.

Shumë ju thonë që ju jeni e ardhmja, por nga pozita dhe përvoja që kam, unë ju them që ju duhet të jeni e tashmja. Kosovës i duhen të rinjtë e kualifikuar, pasioni dhe idetë e tyre. /Telegrafi/