Hasan Preteni, Drejtor i Agjencisë Kundër-Korrupsionit ka thënë për “Tribuna Shqiptare” se nuk ka arsye që t’i kërkojë falje Begjet Pacollit, edhe pse prokuroria e EULEX-it ka vendosur në favor të tij.
Ai thotë se kallëzimi penal i këtij agjencioni ndaj Pacollit ka qenë i bazuar dhe i drejtë. “Në mbesim këmbëngulës se kemi pas prova dhe kemi pas bazë për ushtrimin e kallëzimit penal. Është çështje e gjyqësorit i cili është pushte i veçantë i cili vendos dhe është i pavarur në veprim dhe ne nuk pretendojmë të ndikojmë dhe të ndërhyjmë në punën e tyre në asnjë fazë”, ka thënë Preteni. Ai ka thënë se kallëzimi penal ndaj Pacollit nuk ka të bëjë me teke personale, por është ngritur mbi bazën e dokumenteve të siguruara.
“Misioni ynë është i saktë dhe në asnjë fazë nuk kemi bërë asnjë gabim kundër z. Pacolli e as kundër 700 personave të tjerë ndaj të cilëve kemi ushtruar kallëzime penale në të kaluarën. Këtë nuk e bëjmë për teke personale, por çdo rast kur e vërejmë se ka elemente korrupive ne reagojmë”, ka thënë Preteni. (ORAinfo)
