“Prej ’86-s kemi punu” – Xhavit Haliti tregon se si dhe kur u themelua UÇK-ja

Njëri prej themeluesve të Ushtrisë Çlirimtare të Kosovës dhe veprimtari i hershëm, Xhavit Haliti, është rrëfyer në emisionin Pressing, ku ka folur për kohën kur ka nisur të ideohet ushtria e armatosur për ta kundërshtuar regjimin serb.

Haliti, ka thënë se prej vitit 1986 ka pasur UÇK.

Ai ka thënë se nuk është një takim i veçantë ku është marrë vendimi që të themelohet një ushtri.

Haliti ka përmendur edhe disa aksione që ishin kryer në fund të të ’80-ave, në kuadër të përgaditjeve për luftë të armatosur.

“Prej ’86-s ne kemi punu, që prej fundit të ‘80-ave ka pasë aksione në Kosovë. P.sh. shkatërrimi i damperit në Obiliq, shkatërrimi i largpërçuesve për Serbi, atentatet gjatë protestave në 89-n në Kosovë. Këto janë bërë prej njerëzve që dihen kush janë”, ka thënë Haliti.

Në rrëfimin për Pressing, Haliti ka thënë se të gjitha mbledhjet që janë mbajtur nga Lëvizja Popullore e Kosovës në atë kohë, gjithmonë është folur edhe për organizim ushtarak.

“Të gjitha mbledhjet që janë mbajtë, është mbështetë nga LPK-ja, organizimi ushtarak. Me kriju ushtri duhet me pasë lekë shumë, duhet me pas njerëz të gatshëm. Asnjëherë s’kanë thënë jo.Ke pasë periudhë kohore, kur njerëzit s’e kanë njoftë njëri-tjetrin, janë takuar me maska, sepse rreziku për dekonspirim ka qenë tepër i madh”, ka rrëfyer Haliti.