Pozherani pastrohet në kuadër të “Javës së Gjelbër”, bashkohen institucionet dhe qytetarët

Viti – Në kuadër të shënimit të “Javës së Gjelbër”, është realizuar me sukses aktiviteti “Dita e Pastrimit të Pozheranit”, duke dëshmuar një bashkëpunim të frytshëm ndërmjet institucioneve lokale, shkollave dhe komunitetit.

Ky aktivitet u organizua në bashkëpunim me Mërgatën e Pozheranit, SHMLM “Kongresi i Manastirit”, SHFMU “Halil Alidema” dhe Komunën e Vitisë.

I pranishëm ishte edhe kryetari i komunës, Sokol Haliti, i cili së bashku me përfaqësues institucionalë, nxënës dhe mësimdhënës, mbështeti nga afër këtë nismë me rëndësi për mbrojtjen e mjedisit.

Gjatë aksionit u realizua pastrimi i rrugëve kryesore dhe hapësirave publike përreth institucioneve, përfshirë objektet shkollore dhe ambulancën, duke ndikuar drejtpërdrejt në përmirësimin e kushteve higjienike dhe ambientale në këtë lokalitet.

Nga Komuna e Vitisë u theksua përkushtimi i vazhdueshëm për ndërmarrjen e iniciativave të tilla, me qëllim rritjen e vetëdijes qytetare për një mjedis të pastër dhe të shëndetshëm. Ky aktivitet u vlerësua si një shembull i mirë i bashkëpunimit ndërmjet institucioneve dhe qytetarëve.

Mirënjohje e veçantë iu shpreh nxënësve për angazhimin dhe kulturën qytetare të treguar, si dhe të gjithë pjesëmarrësve që kontribuuan në realizimin e këtij aktiviteti me rëndësi edukative dhe komunitare./rajonipress/