Politologu Maloku: Qasja diplomatike e qeverisë ka dëmtuar rëndë pozitën ndërkombëtare të Kosovës

Politologu Albinot Maloku kritikoi ashpër qasjen diplomatike të qeverisë në detyrë të Kosovës, duke e cilësuar si të dëmshme dhe të papërgjegjshme për interesat ndërkombëtare të vendit.

Ai në një intervistë për Ekonomia Online vlerësoi se dëmet e shkaktuara gjatë qeverisjes së kaluar, veçanërisht në Ministrinë e Punëve të Jashtme të udhëhequr nga Donika Gërvalla, kanë lënë pasoja të rënda që do të kërkojnë kohë dhe përpjekje të mëdha për t’u riparuar.

“Ish-qeveria e Kosovës i ka shkaktuar dëme të mëdha në qeverisjen, po themi, të diplomacisë nga ana e Donika Gërvallës. Dëme të mëdha Kosovës në rrafshin diplomatik, të cilat gjithsesi që do të duhet të investohet shumë që të riparohen” tha Maloku.

Ai mendon se mungesa e angazhimit të mirëfilltë dhe ndërtimi i marrëdhënieve jo të shëndetshme me partnerë kyç ndërkombëtarë kanë prodhuar një situatë të zymtë për vendin në skenën ndërkombëtare.

“Kjo për faktin e shumë arsyeve, duke mos qenë e angazhuar mirëfilli, duke krijuar raporte jo të shëndetshme me faktorë jashtëzakonisht mbështetës për Kosovën. Kjo ka dhënë atë efektin e vet që sot kemi këtë situatë dhe këtë derexhe,” u shpreh ai.

Maloku gjithashtu kritikoi dështimet për anëtarësim në organizata ndërkombëtare si dhe mungesën e një strategjie të qartë dhe të vazhdueshme për integrimin ndërkombëtar të Kosovës.

“Kosovën nuk e kemi të anëtarësuar në mekanizma të rëndësisë së veçantë. Pastaj, mosvazhdimi për t’u anëtarësuar në Interpol ka qenë pjesë e një angazhimi që nuk është dashur, ashtu siç ka qenë,” tha ai, duke shtuar se në të ardhmen kjo duhet të jetë prioritet absolut i çdo qeverie të re.

Sipas Malokut, përmes anëtarësimit në organizata ndërkombëtare, Kosova jo vetëm që siguron të drejtën e vet për të qenë pjesë e komunitetit ndërkombëtar, por edhe forcon pozitën e saj si subjekt shtetëror.

“Synimet e Kosovës për anëtarësim në organizata ndërkombëtare duhet që të jetë edhe shprehje fuqishëm që në qeverinë e ardhshme të jetë prioritet i rëndësisë së veçantë. Kështu, duke nisur nga fakti që përmes anëtarësimit në këto mekanizma ndërkombëtarë Kosova faktorizon prezencën e vet në arenën ndërkombëtare”, tha për EO, politologu Maloku.