Politikani austriak kërkon ndarjen e Kosovës

Strache i ka bërë kështu jehonë deklaratës së kryeministrit serb, sipas të cilit ndarja është e vetmja zgjidhje.

Ndarja e Kosovës është “e vetmja zgjidhje për paqen dhe njohjen e ndërsjellë” ka thënë kryetari i partisë FPÖ të Austrisë heinz Christian Strache.

Duke i bërë jehonë një deklarate të ngjashme të kryeministrit serb Ivica Daçiç, politikani austriak ka thënë se “duhet të ketë drejtësi për pjesët me shumicë serbe në Kosovë”.

“Është koha e fundit që Bashkimi Evropian ta braktisë qëndrimin e tij negativ ndaj Serbisë dhe të marrë në konisideratë edhe të drejtat e serbëve. Në këtë kuptim, një ndarje e Kosovës do të ishte fillimi dhe një kompromis i mirë për të dyja palët”, ka thënë Strache më tutje, raporton gazeta “Salzburger Nachrichten”.

Heinz Christian Strache është kryetar i partisë liberale FPÖ dhe kryesues i grupit të saj parlamentar në Parlamentin Federal të Austrisë.