Politika energjetike e qeverisë në largim, shkatërruese për vendin

Aleanca për Ardhmërinë e Kosovës e ka akuzuar qeverinë se e ka mbajtur vendin në deficit të vazhdueshëm energjetik, në terr dhe të varur plotësisht nga importi, kryesisht nga kompanitë nga Serbia.

“Kjo politikë e dështuar i ka larguar kompanitë më të mëdha perëndimore energjetike dhe e ka mbajtur vendin në varfëri për shtatë vite. Në kohët e fundit ka vendosur për ndërtimin e kapaciteteve prej 600 MW. Kjo strategji e mbyt mundësinë për zhvillim të vendit. I paaftëson kapacitetet enorme energjetike të Kosovës dhe e mban Kosovën ne pozitën e përjetshme të importuesit të energjisë. Këto politika janë antishtetërore dhe antikombëtare”, thuhet në një komunikatë të Aleancës për Ardhmërinë e Kosovës.

Sipas AAK-së, këto politika të cilat iu shkojnë për shtati vetëm oponentëve të zhvillimit të hovshëm të Kosovës do të ndërpriten. “Ne nuk do të lejojmë që njerëzit të cilët nuk mërziten fare për fatin e popullit dhe të vendit të vazhdojnë mëtutje ta degradojnë jetën dhe ta mbysin të ardhmen e vendit. Kosova duhet të bëhet vend i pasur dhe i zhvilluar. Kjo nuk bëhet duke e pamundësuar shfrytëzimin e pasurive tona natyrore. Këto politika janë antikombëtare dhe antishtetërore”, thuhet tutje në komunikatën e AAK-së.

Në fund të kësaj komunikate për media thuhet se “Aleanca do të jetë garant i ndërtimit të kapaciteteve të mëdha energjetike, i zhdukjes së varfërisë dhe papunësisë dhe to ta ndryshojë kursin e deritashëm degradues për vendin dhe për popullin. Ky është premtim”.