Policit, një muaj paraburgim

Gjykata Themelore në Mitrovicë i ka caktuar 30 ditë paraburgim policit Valon Goxhuli. Ai dyshohet se me revolen e tij zyrtare, ka vrarë shtetasin Bekim Birinxhiku, të shtunën në qendër të Skenderajt.

Nën masa të rrepta sigurie, polici Goxhuli, paraditen e së hënës është dërguar në ndërtesën e Gjykatës së Vushtrrisë, ku vepron Gjykata Themelore e Mitrovicës, ku gjyqtari i procedurës paraprake, dëgjoi argumentet e prokurorit dhe të mbrojtjes për masën e paraburgimit.

Në fund, gjyqtari vendosi për Goxhulin për 30 ditë paraburgim pas mbajtjes nën arrest për 48 orë. Të shtunën në qendër të Skenderajt u vra Bekim Birinxhiku nga fshati Qubrel i Skenderajt. Ai ishte ish-ushtar i UÇK-së dhe në këto zgjedhje garonte si kandidat për asamble komunale nga AAK-ja.

I dyshuari për këtë vrasje që tronditi Drenicën një ditë para zgjedhjeve, është Valon Goxhuli i cili në momentin e ngjarjes ishte jashtë detyrës zyrtare./tribuna/