Policia në Kamenicë bashkon bizneset dhe inspektoratin për një sezon veror të qetë dhe të sigurt

Kamenicë – Në kuadër të zbatimit të Planit Operativ “Sezoni Veror 2026”, Drejtoria Rajonale e Policisë së Kosovës, përmes Stacionit Policor në Kamenicë, ka zhvilluar një takim koordinues me Inspektoratin Komunal dhe përfaqësuesit e bizneseve të gastronomisë, restoranteve dhe kafiterive, me synim ruajtjen e rendit dhe qetësisë publike gjatë sezonit veror.

Takimi u udhëhoq nga komandanti i Stacionit Policor në Kamenicë, kapiten Basri Shkodra, së bashku me stafin e tij, ku u diskutua për organizimin e ahengjeve familjare, dasmave dhe aktiviteteve të tjera festive, duke pasur parasysh fluksin e madh të bashkatdhetarëve që pritet të vizitojnë komunën gjatë muajve të verës.

Kapiten Shkodra theksoi se qëllimi i këtij koordinimi është krijimi i një ambienti të sigurt dhe të qetë për të gjithë qytetarët dhe vizitorët, duke kërkuar nga organizatorët e aktiviteteve dhe bizneset që të respektojnë në mënyrë rigoroze ligjet dhe rregulloret në fuqi të Republikës së Kosovës.

Gjatë takimit, përfaqësuesit e bizneseve dhe Inspektorati Komunal shprehën gatishmërinë për të bashkëpunuar ngushtë me Policinë e Kosovës, me qëllim respektimin e marrëveshjeve të arritura dhe garantimin e një atmosfere të qetë gjatë gjithë sezonit veror.

Nga Policia e Kosovës u ritheksua se, në bashkëpunim me institucionet komunale dhe partnerët e tjerë të sigurisë, do të vazhdojnë angazhimet për ruajtjen e rendit publik, duke synuar që qytetarët dhe mërgimtarët të kalojnë pushimet në një mjedis të sigurt, të qetë dhe në përputhje me ligjin./rajonipress/