Policia e Kosovës në Gjilan dhe OSBE diskutojnë avancimin e kapaciteteve të sigurisë

Gjilan – Përfaqësues të Drejtorisë Rajonale të Policisë së Kosovës në Gjilan dhe të Organizatës për Siguri dhe Bashkëpunim në Evropë (OSBE) kanë zhvilluar një takim pune, ku në fokus ishte ngritja e kapaciteteve profesionale të policisë, trajnimet e specializuara dhe vazhdimi i bashkëpunimit ndërmjet dy institucioneve.

Në takim morën pjesë shefi i Operativës Rajonale të Policisë në Gjilan, major Agim Lipovica, me stafin e tij, si dhe Bertram Welsing, drejtor i Departamentit për Siguri Publike në OSBE, Detlev Quigley, shef i Sektorit për Siguri Publike, Erduan Gjigolli, menaxher i projektit në këtë sektor, dhe Migjen Abrashi, asistent programi në OSBE.

Gjatë takimit u diskutuan çështje që lidhen me avancimin e kapaciteteve të sigurisë përmes trajnimeve në fusha të specializuara për Policinë Rajonale në Gjilan, si dhe mundësitë për thellimin dhe vazhdimin e bashkëpunimit të ndërsjellë.

Me këtë rast, major Agim Lipovica falënderoi Bertram Welsingun për mbështetjen e OSBE-së në realizimin e projektit për vendosjen e kamerave monitoruese në fshatin Cërnicë të Gjilanit.

Projekti ishte iniciuar nga Komiteti Lokal për Siguri Publike (KLSP) në Cërnicë dhe Njësia e Komunitetit e Stacionit Policor në Gjilan, me përkrahjen e Komunës së Gjilanit dhe mbështetjen e misionit të OSBE-së.

Lipovica shprehu gjithashtu mirënjohjen për mbështetjen e vazhdueshme që OSBE-ja i ka ofruar Drejtorisë Rajonale të Policisë në Gjilan, duke theksuar rëndësinë e bashkëpunimit institucional në fushën e sigurisë publike./rajonipress/