Policia e Kosovës mban ligjërata vetëdijësuese për sigurinë dhe parandalimin e dukurive negative tek nxënësit

Gjilan – Policia e Kosovës, përmes Njësisë Sektoriale dhe njësitit të Komunitetit të Stacionit Policor në Gjilan, ka realizuar një ligjëratë vetëdijësuese me temën “Siguria në Internet” në shkollën fillore “Don Bosko” në qytetin e Gjilanit.

Në këtë ligjëratë kanë marrë pjesë mbi 200 nxënës të klasave të gjashta dhe të nënta, të cilëve u janë trajtuar çështje që lidhen me sigurinë në internet, keqpërdorimet, ngacmimet dhe shantazhet online, si dhe mënyrat e parandalimit të këtyre dukurive. Po ashtu, nxënësit janë informuar për hapat që duhet të ndërmarrin në raste të tilla dhe për masat ligjore përkatëse.

Në kuadër të aktiviteteve parandaluese, Policia e Kosovës ka mbajtur ligjëratë edhe në shkollën fillore “Skënderbeu” në fshatin Përlepnicë, me temën “Dukuri negative në shoqëri dhe drogat”, ku kanë marrë pjesë nxënësit e klasave të shtata dhe të teta.

Personeli arsimor dhe nxënësit e të dyja shkollave kanë mirëpritur këto ligjërata, duke i vlerësuar ato si të dobishme dhe informuese, me theks në rritjen e njohurive dhe vetëdijesimit të të rinjve.

Policia e Kosovës mbetet e përkushtuar në vazhdimin e aktiviteteve parandaluese dhe në bashkëpunimin e ngushtë me institucionet arsimore, me qëllim të rritjes së sigurisë dhe ndërgjegjësimit të të rinjve./rajonipress/