Policia e komunitetit mban ligjëratë vetëdijësuese për sigurinë me nxënësit në Dobërçan

Gjilan – Në ambientet e Shkolla Fillore e Mesme e Ulët Nazim Hikmet në Dobërçan është zhvilluar të premten një aktivitet informues me nxënësit, i organizuar në bashkëpunim me përfaqësuesit e policisë së komunitetit, me qëllim të ngritjes së vetëdijes për sigurinë dhe bashkëpunimin me institucionet e rendit.

Në këtë takim morën pjesë zyrtarët policorë të komunitetit, Sami Robelli dhe Adile Shabani Shkodra, të cilët prezantuan para nxënësve rolin dhe funksionin e policisë së komunitetit, si dhe rëndësinë e bashkëpunimit ndërmjet qytetarëve, shkollës dhe policisë për ruajtjen e rendit dhe sigurisë.

Gjatë ligjëratës, nxënësit u informuan për tema që lidhen me sigurinë në shkollë dhe në komunitet, parandalimin e dukurive negative dhe mënyrat e raportimit të rasteve që cenojnë sigurinë publike. Aktiviteti u karakterizua nga një diskutim i hapur, ku nxënësit patën mundësinë të parashtrojnë pyetje dhe të ndajnë mendimet e tyre për çështjet e trajtuara.

Drejtori i shkollës, Fadil Shabani, vlerësoi lart bashkëpunimin me policinë e komunitetit, duke theksuar se aktivitete të tilla kontribuojnë në edukimin dhe ndërgjegjësimin e të rinjve për sigurinë dhe përgjegjësinë qytetare.

Ky aktivitet ishte realizuar me kërkesë të arsimtarit të edukatës qytetare dhe njëherësh Koordinatorit për Sigurimin e Cilësisë në shkollë, Rexhep Arifi, ndërsa takime të ngjashme pritet të vazhdojnë edhe në të ardhmen në kuadër të bashkëpunimit ndërinstitucional për forcimin e sigurisë në komunitet ka njoftuar Rexhep Arifi./rajonipress/