Policia e Gjilanit shënon 27-vjetorin e Policisë së Kosovës me aktivitete për komunitetin

Gjilan – Drejtoria Rajonale e Policisë në Gjilan ka organizuar një sërë aktivitetesh në kuadër të shënimit të 27-vjetorit të themelimit të Policisë së Kosovës, me fokus në forcimin e bashkëpunimit me qytetarët, veçanërisht me fëmijët dhe të rinjtë.

Aktivitetet janë zhvilluar në kuadër të projektit “Rreze drite në emblemën time”, përmes të cilit Policia synon të afrojë më tej qytetarët me punën dhe misionin e saj.

Në kuadër të projektit është organizuar aktiviteti “Porta e hapur”, gjatë të cilit nxënës, staf i shkollave, zyrtarë institucionesh dhe qytetarë kanë vizituar stacionet policore. Ata kanë pasur mundësi të njihen nga afër me punën e zyrtarëve policorë, si dhe me pajisjet dhe teknologjitë që përdoren për garantimin e sigurisë.

Aktivitete të veçanta janë zhvilluar edhe për sigurinë në trafikun rrugor, përmes patrullimeve të përbashkëta me nxënës, me qëllim përcjelljen e mesazhit se siguria në rrugë është përgjegjësi e përbashkët.

Po ashtu, janë mbajtur takime me Këshillat Lokale për Siguri në Bashkësi (KLSP), me fokus në forcimin e komunikimit dhe bashkëpunimit me komunitetin, si dhe në shpërndarjen e materialeve informuese.

Policia e Kosovës, e cila për 27 vite ka qenë e angazhuar në ruajtjen e rendit dhe sigurisë publike dhe në mbrojtjen e jetës dhe pronës së qytetarëve, synon që përmes këtyre aktiviteteve përvjetori të shërbejë edhe si mundësi për një afrim më të madh me komunitetin.

Drejtoria Rajonale e Policisë në Gjilan ka shprehur mirënjohje për qytetarët, institucionet, shkollat, mësimdhënësit, nxënësit dhe partnerët e sigurisë për bashkëpunimin dhe mbështetjen e vazhdueshme./rajonipress/