Raportimet e fundit se Policia e Kosovës nuk guxon të hetojë persona të caktuar si dhe rasti i vjedhjes së dhomave të dëshmive në Pejë e kanë shtyrë menaxhmentin e policisë të kujdeset për imazhin dhe punën të cilën e kryejnë policët e Kosovës. Kjo përfshin edhe paraqitjen e tyre në mediat sociale.
Në një grup të krijuar në facebook me emrin Policia e Kosovës – Njësia Speciale, që ka rreth 3,300 anëtarë, mund të kuptohet nga është blerë një qen i njësisë K9 të Kosovës dhe ku është trajnuar.
Aty mund të shihen policë në operacione dhe aktivitete të tjera të tyre, ndërkohë që ndonjë komentues edhe i identifikon ata. Në to janë të postuara shumë fotografi, në mesin e tyre edhe nga trajnimet apo edhe raste kur zyrtarët i ekspozojnë armët dhe pajisjet e PK-së.
Në një kuptim facebooku është shfrytëzuar kështu për përmirësimin e imazhit të Policisë së Kosovës. Përveç kësaj, shumë hetues kanë treguar se si kanë gjurmuar të dyshuarit për informacion pikërisht përmes rrjeteve sociale.
Por pasi shkarkoi përkatësisht ia ndërroi vendet e punës disa eprorëve të Policisë së Kosovës, menaxhmenti policor ka lëvizur që të ndalojë qasjen e të gjithë zyrtarëve në rrjetet sociale. Të paktën kur janë në punë.
Shumë policë kosovarë nuk kanë mundur të hyjnë prej mesit të javës së kaluar në llogaritë e tyre në Facebook, një veprim që ka për qëllim të rris performancën e tyre në punë por ndoshta edhe sigurinë e tyre personale dhe të informacionit policor.
Vendimi nuk është pritur mirë nga pjesëtarët e Policisë së Kosovës të cilët kur kishin klikuar në këtë faqe u kishte dalë njoftimi se ajo faqe nuk mund të hapet nga kompjuterët e policisë. Ky disponim është vërejtur në statusët e disa zyrtarëve policorë pasi ata kanë shkuar dhe janë aktivizuar në shtëpi.
Pjesëtarët e policisë janë të njohur për aktivitetin e tyre në rrjetet sociale. Një pjesë e madhe e policëve dhe eprorëve të tyre kanë të hapura profile të tyre në Facebook.
Zyrtari për informim në Policinë e Kosovës, Brahim Sadriu, nuk ka dashur të komentojë kur është pyetur nga gazeta nëse Policia e Kosovës ka marrë vendim për ta ndaluar qasjen në Facebook nga zyrat e Policisë së Kosovës.
“Postimi ne Facebook është çështje private e çdo polici”, ka thënë Sadriu.
Por së paku tri burime policore i kanë treguar gazetës se qasja në mediat sociale, gjatë orarit të punës, iu është pamundësuar javën e kaluar.
Një numër institucionesh tjera publike, po ashtu e kanë të bllokuar qasjen në mediat sociale.(gazetajnk.com)
