Gjilan – Ka vazhduar edhe sot festa e grumbullimit të të mirave që bujqit i kanë përfituar brenda vitit, e që në Gjilan njihet si “Fshirja e Lamve”, aktivitet ky i nisur dje me grumbullimin e të gjitha prodhimeve në sofrën e madhe në qendër të qytetit.
Gjatë ditës së sotme, bujqit e Gjilanit kanë grumbulluar në qytet kunguj, hotina e shumë prodhime të tjera në shenjë kremtimi për suksesin e arritur në veprimtaritë e tyre.
Kreu i Gjilanit, Lutfi Haziri, ka vlerësuar se festa e “Fshirjes së Lamve” është falënderim ndaj Zotit për begatinë që na e ka dhënë, për bujqit, familjet dhe kompanitë, duke shtuar se produktet tyre janë krenaria dhe brendi i Gjilanit.
Vlen të përmendet se Komuna e Gjilanit, përkatësisht Drejtoria e Bujqësisë në Gjilan, së bashku me partnerët dhe bashkëpunëtorët e saj, ka mbështetur bujqit gjilanas dhe kompanitë me shumën prej 2.5 milionë euro, investime këto, që sipas kryetarit Haziri, kanë ndikuar në suksesin e madh të familjeve farmere dhe kompanive gjilanase të lëmisë përkatëse./rajonipress/
