“Po presim përgjigjen e FIFA-s, lojtarë që ishin në Evropian duan të luajnë për Kosovën”

Menjëherë pasi Kosova u pranua në FIFA dhe UEFA, ku u përcaktua edhe grupi në të cilën do të marrë pjesë në eliminatoret e Botërorit “Rusi 2018”, kanë nisur dilemat dhe dyshimet për shumë lojtarë kosovarë.

Deri tani, futbollistët nga Kosova kanë qenë të detyruar të zgjedhin mes Shqipërisë, Zvicrës apo në raste të veçanta edhe mes përfaqësueseve të tjera.

Çështja e lojtarëve kosovarë që mund të largohen nga Shqipëria ishte shumë e diskutuar gjatë Evropianit. Shumë emra lojtarësh janë përfolur se do të lënë përfaqësueset e mëparshme për të luajtur për Kosovën.

Dhe, në një situatë të tillë, është trajneri i Kombëtares së Kosovës, Albert Bunjaki, i cili në një intervistë për gazetën Panorama Sport ka deklaruar se lojtarë kosovarë që janë pjesë e Shqipërisë kanë shprehur dëshirën të luajnë për Kosovën.

Më poshtë keni intervistën e Bunjakit:
Keni deklaruar në mediat kosovare se disa lojtarë që kanë marrë pjesë në Europian me Shqipërinë, kanë shprehur dëshirën të luajnë për Kosovën?

Po, e vërtetë. Megjithatë, së pari duhet të presim vendimin nga FIFA dhe pastaj do bisedoj sërish me lojtarët.

A mund ta dimë sa lojtarë të Shqipërisë janë dhe nëse mund të na thoni ndonjë emër?

Përpara se të bëhet publik ndonjë emër, mendoj se është me rëndësi të respektohet deri në fund. Por, interesimi për të përfaqësuar shtetin e Kosovës ka qenë edhe më parë, pavarësisht faktit që ne nuk ishim të pranuar nga FIFA dhe UEFA.

Ka interesim nga lojtarë kosovarë që luajnë aktualisht me Shqipërinë. Taulant Xhaka dhe Shkëlzen Gashi janë përfolur pas Europianit se mund t’i bashkohen Kosovës?
E thashë që nuk do të ishte profesionale të përdor emra lojtarësh. Me kohë dhe pas një vendimi pozitiv që shpresojmë të jetë nga FIFA, sigurisht do kuptohen kush janë dhe nga vijnë.

Po për Adnan Januzajn, keni shprehur sërish interesim për ta bërë pjesë të Kosovës?

Është i njëjti rast. Duhet të presim përgjigjen, pastaj do jetë shumë më e lehtë. Por, është normale që ne jemi shumë të interesuar që Adnani të jetë mes nesh. /indeksonline/