“Plani i rrezikshëm”, Thaçit dhe Vuçiqit u vjen një ‘grusht’ i fortë

Analisti politik, Ramiz Bojaj i vlerëson si shumë serioze dhe të domosdoshme të gjitha kundërshtimet që po vijnë nga faktori ndërkombëtar, kryesisht nga SHBA-ja dhe Gjermania për idenë e Hashim Thaçit dhe të Aleksandër Vuqiqit për shkëmbimin e territoreve mes Kosovës dhe Serbisë, si formë për arritjen e një marrëveshje të qëndrueshme historike mes dy vendeve.

Bojaj thotë se edhe analisti Daniel Server, por edhe diplomatët tjerë me ndikim që po e kundërshtojnë këtë ide, po japin një grusht serioz këtij plani. Mirëpo, sipas Bojajt, rreziku mbetet i hapur ngase subjektet politike në Kosovë nuk janë sa duhet të unifikuara në këtë kundërshtim të Thaçit.

“Përndryshe idetë për shkëmbim territoresh janë ide primitive, fashiste e luftënxitëse. Presidenti i Kosovës Hashim Thaçi dhe ai i Serbisë Aleksandër Vuçiq, me projektin e tyre për shkëmbim territoresh, janë projektuesit më saktë të nxitjes së konflikteve të reja ndëretnike në Ballkan, por edhe më gjerë. Ky është presedan i rrezikshëm dhe nxitës për dhunë, ndjekje, spastrime etnike etj. Ky është model i ish diktatorit Sllobodan Millosheviqit, i cili, për ndryshim kufijsh e lëvizje të popullatave, vrau, masakroi, e shkaktoi gjenocid, pothuajse, më të gjithë popujt që kufizohen me Serbinë”, ka deklaruar Bojaj për “Kosova Sot Online”.

Më tej, ai ka kujtuar s si pikërisht këtë model po e zbaton edhe Asadi i Sirisë, por për këtë po rri në këmbë edhe Rusia për t’iu hedhë në qafë Ukrainës dhe vendeve përreth saj.

“Prandaj me të drejtë Ish-diplomati amerikan dhe njohësi i çështjeve që ndërlidhen me Ballkanin, Daniel Server, vlerëson se plani unikat Thaçi-Vuçiq, për shkëmbim territoresh është plan i rrezikshëm, i palogjikshëm dhe realisht i parealizueshëm,pavarësisht se presidenti i Kosovës Thaçi dhe ai i Serbisë, Vuqiç me veprimet e tyre prej diktatorëve të rinj, duke luajtur me kufij e harta, nuk mund të realizojnë planin famëkeq për lëvizje territoresh e popullsisë, gjegjësisht veriu i Kosovës t’i falët Serbisë, ndërsa Serbia t’i japë Kosovës disa fshatra nga Kosova Lindore”, ka thënë Bojaj për “Kosova Sot Online”.

Për fund, analisti Bojaj ka deklaruar se ballafaqimi i fakteve nga diplomacia amerikane dhe gjermane kundër këtij opsioni që paraqet rrezik për stabilitetin e rajonit e më gjerë, do të bëjë që plani për shkëmbimin e kufijve të mbetet i dështuar, sepse edhe ashtu veç është nisur në atë rrugë.

“Ky plan është para dështimit, por për të varrosur përfundimisht këtë iniciativë fashiste, duhet të rrëzohet nga pushteti ‘zbatuesi’ i kësaj ideje serbe e ruse, presidenti Hashim Thaçi. Republika e Kosovës, e as paqja e stabiliteti i Ballkanit nuk mund të shkatërrohet nga disa maniakë me ambicie diktatorësh të rinj”, përfundoi për “Kosova Sot Online”, analisti politik, Ramiz Bojaj.