Përurohen investimet në efiçiencë të energjisë në shkollën “28 Nëntori” në Viti, investim prej rreth 118 mijë eurosh

Viti – Shkolla Fillore dhe e Mesme e Ulët “28 Nëntori” në Viti tashmë ofron kushte më të përshtatshme për nxënësit dhe mësimdhënësit, pas përfundimit të investimeve në masat e efiçiencës së energjisë. Përurimi i punimeve u bë sot në prani të kryeministrit në detyrë të Republikës së Kosovës, Albin Kurti, ministres në detyrë të Ekonomisë, Artane Rizvanolli, drejtuesve të institucioneve arsimore lokale dhe përfaqësuesve të Fondit të Kosovës për Efiçiencë të Energjisë.

Investimi në këtë objekt shkollor kap vlerën prej rreth 118 mijë euro, ndërsa synon jo vetëm uljen e konsumit të energjisë, por edhe krijimin e një mjedisi më të shëndetshëm, më funksional dhe më dinjitoz për zhvillimin e procesit mësimor.

Gjatë përurimit, kryeministri në detyrë Albin Kurti theksoi se ndërhyrjet në efiçiencën energjetike kanë rëndësi të dyfishtë, pasi përveç kursimit të energjisë ndikojnë drejtpërdrejt në cilësinë e kushteve në të cilat nxënësit ndjekin mësimin dhe mësimdhënësit zhvillojnë veprimtarinë e tyre profesionale.

“Kjo është një prej pesë objekteve të rinovuara në Viti, në kuadër të Marrëveshjes së Qeverisë me komunat dhe Fondin e Kosovës për Efiçiencë të Energjisë. Në gjithë skemën, Qeveria po investon 3.8 milionë euro për rinovimin energjetik të 13 objekteve publike në katër komuna: në Viti, në Podujevë, në Lipjan dhe në Shtime, e këto 13 objekte po iu shtohen 125 objekteve të rinovuara më herët në 21 komuna”, deklaroi Kurti.

Sipas tij, investimet në këtë shkollë janë konceptuar si një sistem i integruar, ku ndërhyrjet në temperaturë, ndriçim, cilësinë e ajrit, dritare dhe sistemin e ngrohjes synojnë të krijojnë kushte më të përshtatshme gjatë gjithë vitit, pavarësisht ndryshimeve sezonale të temperaturave.

“Për efiçiencë të energjisë në këtë shkollë kemi investuar rreth 118 mijë euro. Ideja është që temperatura, ndriçimi, ajri, pastaj dritaret, kaldaja, që të gjitha këto të përbëjnë një sistem, që mundëson kushte sa më të dinjitetshme e të përshtatshme edhe për mësimdhënësit që punojnë, por edhe për nxënësit që mësojnë”, tha kryeministri në detyrë.

Kurti gjatë fjalës së tij uroi nxënësit dhe mësimdhënësit për fillimin e vitit të ri shkollor, duke theksuar se mbështetja institucionale për arsimin nuk kufizohet vetëm në përmirësimin e infrastrukturës, por përfshin edhe masa që synojnë lehtësimin e qasjes në arsim dhe përmirësimin e mundësive për fëmijët dhe të rinjtë.

Ai përmendi subvencionimin e teksteve dhe materialeve mësimore për nxënësit nga klasa e parë deri në të nëntën, si dhe skemat e mbështetjes për fëmijët në Republikën e Kosovës.

Në këtë kuadër, kryeministri në detyrë theksoi edhe rëndësinë e krijimit të një rruge të integruar për të rinjtë, nga arsimi parauniversitar deri te studimet dhe punësimi. Sipas tij, arsimi i lartë publik vazhdon të jetë pa pagesë, ndërsa gjatë pesëvjeçarit të kaluar rreth 18 mijë studentë kanë përfituar bursa.

Prej tyre, sipas të dhënave të paraqitura nga Kurti, rreth 9 mijë e 600 bursa kanë qenë bursa elitare për studentë me mesatare mbi 9.0, ndërsa rreth 7 mijë e 300 bursa janë ndarë për studentët në fushat e shkencës, teknologjisë, inxhinierisë dhe matematikës, që përbëjnë rreth 40 për qind të numrit të përgjithshëm të bursave.

Në fjalën e tij, Kurti u ndal edhe te zhvillimi i aktiviteteve jashtëkurrikulare në shkolla, duke veçuar programet “Arti në shkolla” dhe “Sporti në shkolla”. Sipas tij, sistemi arsimor nuk duhet të synojë vetëm përgatitjen e nxënësve për provime, por zhvillimin e tyre të gjithanshëm, duke përfshirë dijen, talentin, mendimin kritik, shëndetin dhe vetëbesimin.

Investimi në shkollën “28 Nëntori” është pjesë e një skeme më të gjerë të rinovimit energjetik të objekteve publike. Në kuadër të marrëveshjes ndërmjet Qeverisë së Kosovës, komunave dhe Fondit të Kosovës për Efiçiencë të Energjisë, janë planifikuar investime prej 3.8 milionë eurosh për rinovimin energjetik të 13 objekteve publike në katër komuna – Viti, Podujevë, Lipjan dhe Shtime.

Këtyre 13 objekteve u shtohen edhe 125 objekte publike të rinovuara më herët në 21 komuna, duke e shtrirë kështu programin e efiçiencës energjetike në një numër të konsiderueshëm institucionesh publike në vend.

Gjatë përurimit, kryeministri në detyrë Kurti u bëri thirrje nxënësve, mësimdhënësve dhe drejtuesve të shkollës që të kujdesen për objektin e rinovuar, duke theksuar se investimi në infrastrukturë duhet të shoqërohet me mirëmbajtje dhe përgjegjësi të përbashkët.

“Kursimi i energjisë fillon me izolimin e mirë, por vazhdon me kujdesin e përditshëm”, tha Kurti.

Në ceremoninë e përurimit ishin të pranishëm edhe drejtori i shkollës Sherif Neziri, zyrtari i Drejtorisë Komunale të Arsimit në Viti Xhevdet Llulleci, si dhe drejtoresha e Fondit të Kosovës për Efiçiencë të Energjisë, Njomza Hoxha.

Në përmbyllje të vizitës, kryeministri në detyrë uroi drejtuesit e shkollës, mësimdhënësit, nxënësit dhe prindërit për vitin e ri shkollor, duke shprehur mbështetjen institucionale për përmirësimin e vazhdueshëm të kushteve arsimore.

Përfundimi i investimeve në shkollën “28 Nëntori” përfaqëson një ndërhyrje konkrete në infrastrukturën arsimore të Vitisë, ku objektivi i efiçiencës energjetike ndërthuret me nevojën për krijimin e hapësirave më të përshtatshme për mësimdhënie dhe nxënie./rajonipress/