Përkrahet nisma për emërtimin e Spitalit Regjional të Gjilanit

Gjilan – Komiteti për Shëndetësi dhe Mirëqenie Sociale (KSHMS) i ka dhënë përkrahje nismës për emërtimin e Spitalit Regjional të Gjilanit.

Komiteti për Shëndetësi dhe Mirëqenie Sociale (KSHMS) i ka dhënë përkrahje nismës për emërtimin e Spitalit Regjional të Gjilanit me një emër të personaliteteve të shquara të historisë sonë kombëtare, nga fusha profesionale, humanitare, kulturore dhe të tjera, por nuk është përcaktuar konkretisht për emrin e dr Fahri Rashidi (Gorani), mjekut të parë shqiptar në Kosovë, nga komuna e Gjilanit, që erdhi si propozim i Këshillit Drejtues të Spitalit Regjional, për t`iu lënë mundësi edhe palëve tjera që të dalin me propozime eventuale.

Nisma është vlerësuar e qëlluar nga kryesuesi i KSHMS, dr Abylatif Latifi, i cili, sa i përket propozimit konkret, ka thënë se emër më koncensual nuk mund të gjendet, megjithatë ai ka respektuar mendimet ndryshe të anëtarëve tjerë që të lihet e hapur mundësia edhe për alternativa tjera.

Dr Xhavit Hajdari, drejtor ekzekutiv i SRGJ, i cili e ka arsyetuar propozimin e Këshillit Drejtues, ka thënë se për këtë emër ka mirëkuptim edhe në Ministrinë e Shëndetësisë, e cila është përgjegjëse për zyrtarizimin e emërtimit, edhe nga kryetari i Komunës, i cili është njoftuar me këtë nismë.

Ai tha se dr. Fahri Rashidi është i lindur në Gjilan, në vitin 1881, në një familje me tradita atdhedashurie dhe ishte mjeku i parë shqiptar në Kosovë, që kryesisht punoi në Shqipëri. Ai ka bashkëpunuar me atdhetarë dhe përfaqësues të forcave demokratike, si Isa Boletini, Bajram Curri, Fan Noli dhe të tjerë./rajonipress/

Shpërndaje.
© RAJONIPRESS