Për mandatin e EULEX- it merret vesh pas qershorit 2014

Lidhur me mandatin e ri të EULEX-it pas qershorit 2014 do të diskutohet dhe do të arrihet marrëveshja mes BE-së dhe Qeverisë së Kosovës. Në BE nënkupton që jo vetëm kolegët dhe strukturat tona në Bruksel dhe `shefat` por edhe shtetet anëtare, tha ndër tjerash shefi i EULEX-it, Berndt Borchardt në një intervistë për RTK-në.

Ai tha se ky është një proces i komplikuar për gjetjen e kompromisit, dhe ky proces i pasqyron një numër zhvillimesh të rëndësishme mes Kosovës dhe Bashkimit Evropian.

Sipas tij, ky ka qenë një vit shumë i rëndësishëm për Kosovën në zhvillimin e marrëdhënieve me BE-në. MSA, respektivisht negociatat për Marrëveshjen e Stabilizim-Asociimit kanë filluar.

“Negociatat për liberalizimin e vizave janë duke u zhvilluar dhe, ç`është më e rëndësishmja, me ndërmjetësimin e BE-së, janë arritur shumë marrëveshje mes Beogradit dhe Prishtinës, kurse Misioni është shumë i angazhuar për të ndihmuar në zbatimin e këtyre marrëveshjeve. Prandaj, ekziston nevoja për një përqasje të re, e cila i merr parasysh qëndrimet e Qeverisë së Kosovës, prandaj situata është e re”, ka thënë ai.