Për katër muaj, 46 mijë euro për telefona të rinj

Markave të reja të telefonave mobilë s’po mund t’i rezistojnë zyrtarët e institucioneve shtetërore. Ata për të qenë në hap më kohen, po shpenzojnë mijëra euro të buxhetit të shtetit.

Për katër muajt e parë të këtij viti, me telefona të rinj janë pajisur zyrtarët e lartë të Ministrisë së Punëve të Jashtme, ata të Ministrisë së Punëve të Brendshme, Policia e Kosovës, Ministria për Kthim dhe Komunitete, Posta e Kosovës dhe zyrtarët e Aeroportit Ndërkombëtar “Adem Jashari”.

Sipas përllogaritjeve të gazetës, duke u bazuar në njoftimet zyrtare të publikuara nga Zyra e Komisionit Rregullativ të Prokurimit Publik, del se të gjitha këto institucione gjatë kësaj periudhe kanë shpenzuar 46 mijë euro për blerje të telefonave mobilë. Ministria Punëve të Jashtme që udhëhiqet nga ministri Enver Hoxhaj, prin sa i përket shpenzimeve në teknologjinë e fundit të komunikimit.

Kjo ministri për këtë punë ka dhënë tenderin në vlerë prej 9,700.50 eurove. Këtë tender e ka fituar kompania ”Asseco See”. Edhe ministri i Punëve të Brendshme, Bajram Rexhepi, nuk ka kursyer para të buxhetit për blerje të telefonave. Ai për t’ua bërë më te lehtë komunikimin punonjësve të vet, u ka blerë telefona në vlerë prej 6,046.00 euro.(Tribuna)