Pasuritë kriminale drejt konfiskimit

Luftë kundër korrupsionit në nivele të larta. Politikanët kanë deklaruar miliona euro pasuri të paverifikuar

“Ministria e Drejtësisë e ka themeluar një grup punues për hartimin e ligjit që lejon konfiskimin e pasurisë së paligjshme edhe pa aktgjykim dënues dhe nëse aprovohet ky ligj nga ana e Kuvendit të Kosovës, atëherë ligji në fjalë do të lehtësojë punën e organit të ndjekjes, ngase barra e të provuarit do të zhvendoset në masë më të madhe tek i pandehuri”, u shpreh Shqipdon Fazliu, koordinator kombëtar për luftimin e krimit ekonomik dhe korrupsionit

Korrupsioni edhe 8 vjet pas shpalljes së Pavarësisë mbetet tema më e përfolur në Kosovë. Lufta kundër korrupsionit është një nga kriteret kyçe që duhet plotësuar për anëtarësim në Bashkimin Evropian, por institucionet shtetërore kanë shumë për të bërë në këtë drejtim, sepse rezultatet mungojnë. Sidomos korrupsioni i nivelit të lartë, përmes të cilit pushtetarët pasurohen jashtëligjshëm dhe në kurriz të qytetarëve, ishte gjithmonë pjesë e debateve dhe strategjive të ndryshme që u hartuan nga institucionet dhe organizatat relevante për luftimin e kësaj dukurie, ndërsa nuk pati efekt në kapjen e “peshqve” të mëdhenj. Edhe pse për qëllim të parandalimit dhe luftimit të korrupsionit në vitin 2012 u formua Këshilli Kombëtar Kundër Korrupsionit, nga presidentja e vendit, Atifete Jahjaga, sot, tre vjet pas themelimit të këtij këshilli, korrupsioni vazhdon të paraqesë pothuajse sfidën më madhore. Sipas ”Transparency Inernational”, Kosova mbetet ndër vendet me korrupsionin më të lartë./kosova sot/