Pasjaku dhe Koretishta bëhen me ujësjellës

Gjilan – Zyrtarisht është lëshuar në punë ujësjellësi në fshatrat Koretisht dhe Pasjak i cili ka disa vite që nuk ishte në funksion për shkak të problemeve të shumta që kanë penguar furnizimin e rregullt me ujë të këtyre dy vendbanimeve.

Sipas zyrtarëve komunal problemi më i madh ishte për shkak të mos pagesës së faturave të rrymës si dhe mungesa e kompanisë e cila do të menaxhonte me këto ujësjellës.

“Është paguar edhe rata e fundit e borxhit të mbetur, gjithashtu para disa muajve e kemi zgjidhur edhe problemin e menaxhimit të cilën e ka marrë kompania regjionale “Hidro Morava“ nga Gjilani” ka thënë kreu i komunës.

Momentalisht ekipi i furnizimit me energji elektrike “KEDS” është duke i bërë edhe disa rregullime në trafo dhe njëherit edhe ekipi nga “Hidromorava“ gjatë ditës i bënë edhe përgatitjet e fundit që uji të mbërri në të gjitha familjet.

Ivanoviq ka thënë se është dashur shumë që të punojmë që të arrimë deri te një zgjidhje përfundimtare e kjo është furnizimi i rregullt me ujë të pijshëm të të gjitha ekonomive familjare të cilat janë të kyçura në këtë ujësjellës./rajonipress/