Pasionet e Blerim Destanit!

Është përfolur shumë shpesh për sukseset e tij në botën e filmit. E po aq shpesh është përfolur edhe për lidhjet e tij me femrat. Por, asnjëherë nuk është shkruar për pasionet e shumta që ai ka. Blerim Destani mund të njihet si njëri ndër personalitetet mjaft të dashura në vend, por nëse i bëjmë një vizitë rrjeteve sociale që ai ka, do të takojmë jo vetëm një aktor të madh, por edhe një njeri të thjesht e të pasionuar pas shumë gjërave.

Është e pamundur të shfletosh gazetat a të klikosh portale të ndryshme, e të mos lexosh të paktën një lajm mbi jetën e aktorit të mirënjohur Blerim Destani. Përqendrimi i tij në kinematografinë gjermane dhe sukseset e tij të njëpasnjëshme kanë rrëmbyer tërësisht vëmendjen e medias në vend e jashtë tij, ndërsa angazhimet e shumta të aktorit, në botën e filmit, kanë bërë të kuptojmë se Blerim Destani tashmë mund të vlerësohet me plot të drejt si njëri ndër aktorët e mëdhenj shqiptar. Dhe këtë gjë më së miri e dëshmojnë rolet dhe aktrimi i veçantë që ai ka shfaqur në shumë filma, të cilët tashmë kanë rrëmbyer kinematë më të mëdha evropiane e botërore.

I pasionuar veçanërisht ndaj vlerave të origjinës

Dhe, përkundër faktit se angazhimi i tij primar është aktrimi, Blerim Destani ka edhe një jetë të tërë larg kësaj ‘bote’. Shumë shpesh ai është komentuar edhe për lidhjet e mundshme me vajza të ndryshme të ekranit, ‘lidhje’ këto të cilat asnjëherë nuk i ka pohuar si të vërteta. Por, ajo për çfarë është komentuar më pak për të, e që njëherësh ka nxitur redaksinë e “Tribuna Shqiptare” të shfletoj më shumë, janë pasionet që aktori ka. Për pasionet e tij më së miri flasin fotot që Blerimi ka publikuar nëpër rrjetet sociale të tij.

Nëse i futemi një ‘rrugëtimi’, nëpër profilin e tij në facebook, mund të vërejmë se ai përpos një aktor i suksesshëm, është edhe një njeri i pasionuar pas sportit. Tenisi e basketbolli janë vetëm disa nga sportet e tij të preferuara, ndërsa fitnessi mbetet një ndër aktivitetet më të shpeshta të tij.

Por, nuk mbaron me kaq. Blerimi ka një pasion të pa përshkruar edhe ndaj veturave, motorëve e biçikletave, ndërsa lundrimet me varkë janë të pashmangshme, atëherë kur aktori ndodhet afër ndonjë bregdeti. Një mashkull të ‘përkryer’ mund ta bëjë edhe përgatitja me pasion e ushqimit, ndërsa në një foto që ai ka publikuar në facebook, duket sikur është ‘miqësuar’ shumë me kuzhinën.

Dhe ajo që e veçon më shumë, nga shumë fytyra të njohura të artit në vend, e që thënë të vërtetën e plotëson edhe më shumë, janë purot. Në të shumtën e fotove ai mban një puro në dorë, ndërsa në një intervistë dhënë kohë më parë ai pat nënvizuar se “më pëlqejnë purot, e para së gjithash më pëlqen rituali që është i ndërlidhur me konsumimin e purove. Është diçka që më mundëson të reflektoj.”
Si një ‘rapsod’ i denjë, Blerimi ka pozuar edhe përkrah rapsodit Osman Sefa, ndërsa ka bërë me dije se është i pasionuar pas muzikës shqiptare. E dashurinë e madhe për instrumentet e folklorit shqiptar ai e ka shfaqur edhe në disa foto tjera, ndërsa shihet sikur është duke interpretuar në to.

Lidhjen e tij me vendlindjen, aktori e ka dëshmuar shumëherë, ndërsa përveç prononcimeve nëpër botë për origjinën e tij, ai ka pozuar me flamurin shqiptar, gjatë vizitave të shumta nëpër qytetet e ndryshme në Shqipëri, Kosovë e Maqedoni. Aktori, ka një pasion të veçantë edhe ndaj ushqimit tradicional shqiptar, për çfarë nuk heziton të pohoj asnjëherë.

Pasionet e tij nuk kanë të ndalur. Ai në disa foto shihet edhe një si banakier, ndërsa përgatit kokteje të ndryshme, e në shumë sosh shihet edhe nëpër udhëtime të ndryshme nëpër botë, që gjë len të kuptojmë se udhëtimet mbesin një ndër pasionet më të mëdha të aktorit shqiptar. (ORAinfo)