Pasaporta shqiptare alarmon Konsullatën amerikane!

Punëtorja në sportel kishte ndjerë një aromë të pazakonshme kur kishte hapur pasaportën e shqiptarit.

Pasi që një punëtore e Konsullatës amerikane në Berlin ishte ankuar për një “erë të çuditshme”, dhe dy koleget e saj ishin ankuar për “probleme me frymëmarrje” ishte bllokuar për disa orë konsullata. Shkaktar i gjithë kësaj tollovie ka qenë, pa dijen e tij, një shtetas shqiptar, respektivisht pasaporta e tij!

Punëtorja në sportel kishte ndjerë një aromë të pazakonshme kur kishte hapur pasaportën e shqiptarit. Kjo aromë i kishte sjellë asaj një “shije metalike” në gojë. Këto ankesa kishin mjaftuar që përgjegjësit e sigurimit të ngrinin alarmin për sulm të mundshëm me gaz helmues dhe të mbyllnin lokalet e konsullatës, njoftojnë mediet gjermane. Të tri gratë e alarmuara janë dërguar në spital për kontroll.

Është dashur të kalonin katër orë që policia të hiqte alarmin dhe të zhbllokonte lokalet e konsullatës.

Personi që kishte shkaktuar këtë kaos, me pasaportën e tij shqiptare po kërkonte vizë për të shkuar në SHBA, ka njoftuar policia e Berlinit. Testi i shpejtë që i është bërë pasaportës së shqiptarit ka konstatuar se brenda saj nuk ka pasur substanca të dyshimta.(albinfo.ch)

Shpërndaje.
© RAJONIPRESS