Pas takimit me Bislimin, Lajçak paralajmëron një vizitë edhe në Serbi

Emisari i BE-së për dialogun Kosovë – Serbi, Miroslav Lajçak ka dhënë disa detaje për takimin që pati në Kosovë javën e kaluar me zëvendëskryeministrin, Besnik Bislimi.

Lajçak përmes një postimi në rrjete sociale ka bërë të ditur se pas Prishtinës do të vizitojë Beogradin për të përgatitur takimin e radhës në nivel kryenegociatorësh në Bruksel.

“Me zëvendëskryeministrin e parë Besnik Bislimi, diskutova për zhvillimet e fundit gjatë verës, agjendën e takimit të ardhshëm të kryenegociatorëve dhe qasjet se si të trajtohen disa nga çështjet aktuale, si dhe hapat e ardhshëm drejt zbatimit të Marrëveshjes për rrugën drejt Normalizimit. Më pas do të shkoj në Serbi në përgatitje të takimit të radhës në kuadër të Dialogut për normalizimin e marrëdhënieve ndërmjet Kosovës dhe Serbisë”, ka thënë Lajçak.

Ndryshe, javën e kaluar Lajçak zhvilloi një vizitë zyrtare në Kosovë ku u takua me zëvendëskryeministrin e Kosovës, Besnik Bislimi. Në këtë takim diskutimet u përqendruan në tri tema kryesore: dakordimin dhe përgatitjet për takimin e radhës në nivel të kryenegociatorëve, zhvillimet rreth hapjes së urës kryesore të Mitrovicës mbi lumin Ibër dhe rruga përpara me planin e sekuencimit të zbatimit të Marrëveshjes së Brukselit dhe Aneksit të Zbatimit. /Telegrafi/