Pas një karriere të gjatë në shërbim të qytetarëve, Mifail Azizi pensionohet dhe nderohet me mirënjohje nga kryetari Haliti

Viti – Pas shumë vitesh shërbimi në administratën komunale, zyrtari komunal Mifail Azizi është pensionuar, ndërsa me këtë rast është pritur në një takim nga kryetari i Komunës së Vitisë, Sokol Haliti.

Në takim ishte e pranishme edhe drejtoresha për Ekonomi, Financa dhe Zhvillim, Milihate Ajeti, e cila, së bashku me kryetarin Haliti, shprehu mirënjohje për angazhimin dhe kontributin e Azizit gjatë gjithë karrierës së tij profesionale.

Kryetari Haliti e vlerësoi lart punën shumëvjeçare të Mifail Azizit, duke theksuar se ai ka qenë shembull i përkushtimit, profesionalizmit dhe përgjegjësisë në kryerjen e detyrave në shërbim të qytetarëve dhe të institucioneve komunale.

Në shenjë respekti dhe vlerësimi për kontributin e dhënë ndër vite, kryetari i Komunës i ndau z. Azizi një mirënjohje, duke e falënderuar për punën e tij dhe duke i uruar shëndet, mbarësi dhe vite të qeta e të lumtura në pension.

Ceremonia u zhvillua në frymë mirënjohjeje, duke vënë në pah rëndësinë e vlerësimit të zyrtarëve që me punën dhe përkushtimin e tyre kanë lënë gjurmë në administratën komunale dhe në shërbim të komunitetit./rajonipress/