Pas balotazhit, Thaçi me partner të ri qeveritar

Qeveria e drejtuar nga Partia Demokratike e Kosovës dhe partneri i saj i koalicionit, Aleanca Kosova e Re, kanë probleme me numrat në Kuvendin e Kosovës. Ajo më nuk i ka votat e Fatmir Limajt, Jakup Krasniqit dhe Nijazi Idrizit. Në anën tjetër, partneri i saj AKR gjithashtu ka vazhduar të tkurret me ikjen e deputetëve.

Por, për dalje nga kjo situatë, kryeministri Hashim Thaçi, tanimë e ka gjetur formulën. Burime të sigurta të reporteri.net, bëjnë të ditur, se me të përfunduar balotazhi, qeveria e Kosovës do të riformatohet.

Për ta quar deri në fund mandatin e saj qeverisës, PDK në mesin e këtij dhjetori, do të ndërrojë partnerin e koalicionit, transmeton reporteri.

Aleanca për Ardhmërinë e Kosovës, e cila kohëve të fundit ka treguar një afri me partinë e Thaçit, do ta zëvendësojë në qeveri, AKR-në e Behgjet Pacollit. Sipas këtij burimi, kreu i AAK-së Ramush Haradinaj, do ta ketë rastin që të dëshmohet me punë, si numri dy i qeverisë, e cila do të vazhdojë të drejtohet nga kryetari i PDK-së, Hashim Thaçi.

Ndërsa Behgjet Pacolli me partinë e tij AKR, deri në zgjedhjet e ardhshme parlamentare, aktivitetin e tij politik, do ta vazhdojë në opozitë. /Telegrafi/