Partitë pajtohen që 7 qershori të jetë data e zgjedhjeve

Partitë politike janë pajtuar që zgjedhjet e parakohshme parlamentare të mbahen më 7 qershor.

Kështu u bë e ditur pas takimit që përfaqësuesit e partive politike kishin me ushtruesen e detyrës së presidentes, Albulena Haxhiu, rreth datës së zgjedhjeve, raporton Zeri.info.

Kryetari i PDK-së, Bedri Hamza, ka deklaruar se data më e kërkuar për të mbajtur zgjedhjet ishte 7 qershori.

Megjithatë, ai tha se PDK-ja do ta respektojë cilëndo datë.

“Shumica e përfaqësuesve kanë qenë për datën 7, por ne do të shohim tutje. PDK-ja është gati për zgjedhje”, tha Hamza.

Edhe ish-shefja e Grupit parlamentar të LDK-së, Jehona Lushaku-Sadriu, ka thënë se janë dakord për këtë datë, mirëpo tha se, shpreson që qytetarët t’i mbështesin ata që punojnë për të mirën e tyre.

“Si LDK dhamë opinionin tonë që brenda kornizave ligjore të shpallet 7 qershori si data e zgjedhjeve me që ishte edhe si arsyetim që KQZ-ja ka kërkuar paraprakisht për shkak që i nevojitet më shumë kohë për mobilizim të strukturës së saj për organizimin sa më profesional të zgjedhjeve dhe normalisht që e mirëkuptojmë këtë kërkesë dhe jemi dakord për datën 7 qershor. Normalisht që ne deri këtu kemi thënë që ne jemi të synuar që t’i japim Kosovës një vizion tjetër, një bashkim të së djathtës, e cila do të ketë një vizion zhvillimor për Kosovën, një program zhvillimor për Kosovën, për një Kosovë që i forcon aleancat ndërkombëtare, që prezanton projekte zhvillimore, hap vende të punës dhe jo që ta lejë vendin nën sanksione dhe në skema sociale. Prandaj besoj shumë që qytetarët e Kosovës do ta shohin këtë risi dhe do t’i mbështesin ata që dinë dhe ata që ua rregullojnë jetën atyre”, u shpreh Lushaku-Sadriu, raporton tutje Zeri.info.

Nënkryetari i AAK-së, Ardian Gjini, ka konfirmuar se pritet të jetë kandidat për kryeministër në zgjedhjet e ardhshme. Ai tha se AAK-ja po përgatitet për një betejë, jo për të kaluar pragun, por për t’i dhënë Kosovës një qeveri normale.

“AAK-ja është duke u bërë për një betejë, ajo s’ka të bëjë me prag, por për t’i dhënë Kosovës një qeveri normale. Deri tash kemi pas fjalë të forta e punë hiç, Kosova e ka shansin edhe një herë dhe ne po përgatitemi për t’i dhënë këtë shans Kosovës”, tha Gjini pas takimit me u.d të presidentes Albulena Haxhiu, ku u diskutua për datën e zgjedhjeve.

Ai mohoi që AAK-ja do të hyjë në koalicion parazgjedhor.

“Jemi përgatit me garua vetëm dhe t’i dhënë Kosovës dalje nga kjo krizë”, tha Gjini. /Zëri