Partitë e vogla kërkojnë zgjedhje

Edhe drejtuesit e partive joparlamentare po kërkojnë që vendi të shkojë në zgjedhje të parakohshme pas dorëheqjes së kryeministrit Ramush Haradinaj. Haradinaj para më shumë se dhjetë ditësh është dorëhequr menjëherë pas ftesës që ka marrë nga Gjykata Speciale, përderisa presidenti Hashim Thaçi për këtë javë ka paralajmëruar se do t’i nisë konsultimet me drejtuesit e subjekteve politike, shkruan sot gazeta “Zëri”.

Partia Shqiptare Demokristiane e Kosovës (PSHDK) në zgjedhjet e fundit parlamentare kishte koalicion parazgjedhor me koalicionin PAN (PDK – AAK – Nisma), por gati dy vjet pas zgjedhjeve ata shprehen të zhgënjyer me ta.

Emanuel Demaj, nga PSHDK-ja, ka thënë për “Zërin” se janë të zhgënjyer nga koalicioni PAN, pasi marrëveshja e lidhur me PDK-në nuk ishte zbatuar fare nga ata. Ai ka kundërshtuar krijimin e një qeverie teknike në vend, derisa ka thënë se vendi duhet të shkojë në zgjedhje.

“Si Parti Demokristiane kemi mbajtur një mbledhje të kryesisë dhe kemi diskutuar për situatën aktuale dhe qëndrimi i partisë sonë është që vendi të shkojë në zgjedhje pas kësaj situate ose të pritet ndonjë kërkesë nga miqtë tanë ndërkombëtarë, ndonjë sugjerim nga ta se çfarë duhet të veprojmë. Mendimi i shumicës së partisë është që vendi të shkojë në zgjedhje, pavarësisht situatave të cilat priten të krijohen, sepse një qeveri teknike nuk mendoj se do të zgjidhte diçka përpos që do t’i zvarriste proceset dhe do ta bllokojë shtetin e Kosovës”, ka thënë ai.