Paqja në Kuvend, e përkohshme

Një “armëpushim” i përkohshëm pritet të mbizotërojë të paktën deri javën e ardhshme në Kuvendin e Kosovës, pasi që blloku opozitar ka vendosur të mos bëjë “probleme” ditën e hënë, kur është planifikuar të mbahet një seancë me vetëm një pikë të rendit të ditës, ratifikimin e Marrëveshjes për Stabilizim-Asocim (MSA) mes Kosovës dhe Bashkimit Evropian.

Seanca e rregullt ishte planifikuar të mbahej më 2 nëntor, por është shtyrë për kohë të pacaktuar, pasi që Kryesia e Kuvendit ka vendosur që të hënën të mbahet një seancë tjetër, ajo për MSA-në, për çka është pajtuar edhe opozita. Kuvendi gjithashtu, pritet të jetë i qetë edhe më 6 nëntor, në një seancë që organizohet për nder të Johannes Hahn, komisionar për Zgjerim i Bashkimit Evropian, i cili me një fjalim do t’i adresohet Kuvendit.

Tri partitë politike opozitare, LVV, AAK dhe “Nisma” kanë garantuar se në këto dy seanca nuk do të bllokojnë punën e Kuvendit të Kosovës, por kjo nuk nënkupton se legjislativi po i kthehet normalitetit, pasi që avazi i tyre i bllokimit do të vazhdojë. Madje, opozitarët do të vazhdojnë me skenarët e tyre të përdorimit të gazit lotsjellës dhe bllokimit të hyrjeve të Kuvendit nga aktivistët e tyre për të mos lejuar deputetët e mazhorancës që të hyjnë në Kuvend, me qëllim që të pengohet puna e Parlamentit./zeri/