Papërgjegjësia Komunale ndaj banorëve të qytetit!

Gjilan – Në rrugën “Halim Aga”, lumi Stanishorka nuk është më thjesht një rrjedhë uji, por është shndërruar në një rrezik të heshtur që çdo ditë u afrohet më shumë banorëve përreth. Pas vërshimeve të fundit që përfshinë qytetin tonë, tash e më shumë se një muaj, ky segment ndodhet në një gjendje alarmante, dheu është gërryer thellë, baza është dëmtuar rëndë dhe asfalti po humb qëndrueshmërinë, duke rrezikuar shembjen dhe duke cenuar drejtpërdrejt shtëpitë e qytetarëve ka shkruar Ujmir Krasniqi.

Postimi i plotë:

Pavarësisht kësaj situate tejet shqetësuese, Komuna ka zgjedhur heshtjen si përgjigje. Asnjë dalje në terren, asnjë vlerësim profesional dhe asnjë veprim konkret për të parandaluar një pasojë që nesër mund të jetë e pariparueshme.

Kjo mos përgjegjësi institucionale po e kthen një problem të njohur në një kërcënim real për jetën dhe pronën e qytetarëve.

Ironia është edhe më e madhe kur dihet se lumi Stanishorka është pjesë e planeve rregulluese, por këto plane kanë mbetur vetëm në letra. Në terren, puna është lënë në gjysmë dhe gjendja po përkeqësohet çdo ditë. Një problem i injoruar sot është një fatkeqësi e paralajmëruar nesër. /rajonipress/