Pacolli: Thaçi do ta ketë vështirë të punoj pa AKR-në

Kryetari i AKR-së, Behgjet Pacolli, ka thënë sonte se kjo parti e ka ndihmuar qeverinë që të ketë sukses.

Pacolli i ka quajtur naiv ata njerëz që kanë thënë se AKR-ja mund të largohet nga koalicioni qeveris.

“Besoj që AKR-ja e ka bërë një punë të suksesshme në qeveri. Thaçi do të ketë të vështirë të punoj pa AKR-në, mirëpo ne nuk do ta lusim askënd dhe në atë moment që na zvogëlohet hapësira jemi të gatshëm të dorëzojmë detyrën dhe t’i marrim plaçkat për të kontribuar diku tjetër”, ka thënë numri dy i qeverisë në pritjet organizuar për festat e fundvitit.

Ai ka thënë se gjatë këtij mandati AKR-ja nuk ka qenë parti e skandaleve, e korrupsionit, duke shtuar se çdo punë që ka bërë kjo parti ka qenë e pastër si loti.

Sa i përket lobimit, Pacolli ka thënë se në vitin e ri nuk do të udhëtoj shumë, por do të përqendrohet në OKB.

Ai po ashtu ka bërë të ditur se Kuvendi Zgjedhor i AKR-së do të mbahet në fund të marsit të vitit 2013.

“AKR do të rritet edhe më shumë”, ka thënë Pacolli. (ORAinfo)

Shpërndaje.
© RAJONIPRESS