Pacolli synon Otranton

Zëvendëskryeministri i parë i Kosovës, biznesmeni Behgjet Pacolli, është i interesuar ta blejë hotelin “Otranto” të Plazhit të Madh të Ulqinit dhe ta transformojë atë në një hotel me pesë yje.

Këtë informatë e dha për Vijesti të Podgoricës, miku i afërt i tij dhe drejtor i LIdhjes Turistike të Kosovës, Shkëlzen Rizaj.

Ish burri i këngëtares së njohur italiane, me origjinë shqiptare, Ana Oxa, që është edhe shqiptari më i pasur i Kosovës, kohë më parë në qendër të Prishtinës ka hapur hotelin me pesë yje, Swiss Diamond Prishtina.

Rizaj ka thënë se Pacolli i gëzohet paralajmërimit të Qeverisë së Malit të Zi për hapjen e sekretariatit të veçantë që do të jetë i ngarkuar me investimet kapitale, se do të mbikëqyrë direkt zbatimin e realizimeve, gjë që do t’ua mundësojë investitorëve që më lehtë të marrin leje dhe dokumentet tjera të nevojshme.

“Pacolli nuk është i interesuar vetëm për blerjen e ‘Otrantos’. Ai planifikon ta zgjerojë kompleksin dhe ta bëjë me pesë yje”, ka thënë Rizaj, duke shtuar se edhe investitorët tjerë nga Kosova kanë pritur heqjen e këtyre barrierave.

“Ka interesime edhe për projektin ‘Holegra’, derisa disa investitorë po presin miratimin e planit për zonën prapa ‘Albatrosit’”.

Pacolli, raporton Vijesti, konsiderohet mik i familjes Clinton, Bush dhe Jelcin, ndërsa në Lugano ku e ka vilën, fqinj e ka raportuesin e Këshillit të Evropës, Dick Marty, raporti i të cilit për tregti të organeve e ngarkon edhe kryeministrin e Kosovës, Hashim Thaçi. /Telegrafi/