Pacolli në Klinë: Dilni masovikisht në votime për fitoren e Koalicionit të shpresës!

“Fitorja jonë sot ka filluar nga Deçani, ka vazhduar në Pejë , e tash edhe në Klinë”, ka thënë sot Presidenti i Aleancës Kosova e Re, Behgjet Pacolli, para qindra qytetarëve të pranishëm në tubimin zgjedhor që është mbajtur në Komunën e Klinës.

“Unë vendosa t’i bashkohem këtij koalicioni sepse ishte vendim i drejtë. Z.Hoti është kandidati më i mirë për kryeministër që e ka Kosova”, ka thënë Presidenti i AKR-së. Ai ka shtuar se lista kandidatëve të koalicionit është një listë që në vete përmban akademikë, doktorë e profesorë.

Presidenti Pacolli ka theksuar se është pikërisht koalicioni AKR-LDK-LD-Alternativa, që Kosovën do ta bëjë vend të dashur për qytetarët e saj. “Ju ftoj që me datë 11 qershor të dilni masovikisht ashtu siç jeni mbledhur këtu sot dhe t’i votoni njerëzit e punës, njerëzit që i do Evropa dhe njerëzit që do të krijojnë lëvizje të lirë për ju.”

Lideri i AKR-së ka shtuar se, këtë nuk do të mund ta bëjnë ata që i ikin drejtësisë e që e vjedhin Kosovën, por njerëzit e punës e të sukseseve të cilët do të punojnë për Kosovën dhe qytetarët e saj. Ai ju ka bërë thirrje edhe njëherë qytetarëve të shumtë, të cilët ishin të pranishëm në këtë tubim, që përkrahjen dhe besimin e tyre t’ia japin koalicionin të shpresës në krye me Dr.Avdullah Hoti.

Ndërkaq kandidati për kryeministër nga radhët e koalicionit AKR-LDK-LD-Alternativa, Avdullah Hoti, ka thënë se koalicioni AKR-LDK-LD-Alternativa, përfaqësohet nga njerëz kompetentë. “Bashkimi ynë në këtë koalicion është natyral. Prandaj edhe programet e partive që janë pjesë e këtij koalicioni janë harmonizuar lehtësisht. Rivalët tanë nuk po ofrojnë program qeverisës, sepse përveç fjalëve nuk kanë asgjë konkrete për zgjidhjen e çështjeve jetike me të cilat përballen qytetarët e Kosovës”, ka deklaruar Hoti ndër të tjera.

Më pas është bërë edhe prezantimi i kandidatëve për deputetë nga radhët e koalicionit AKR-LDK-LD-Alternativa./rajonipress/