Pacolli: Kalova 230 ditë në rrugë për të lobuar

Gjilan – Behgjet Pacolli të shtunën vonë në Gjilan ka takuar elektoratin e AKR-së. Foli për njohjet, raportet me Qeverinë, punën e tij të palodhshme për të lobuar. Pacolli tha se i ka kaluar hiq më pak se 230 ditë jashtë Kosovës duke ecur në mbi 48 shtete të Afrikës.

Lideri i AKR-së dhe zëvendëskryeministri i Kosovës Behgjet Pacolli të shtunën ka takuar elektoratin e AKR-së në Gjilan. Pacolli është pritur me duartrokitje derisa ka folur për punën e tij të palodhshme që ka bërë dhe po bënë për Kosovën dhe qytetarët e saj. “Ndihem krenar kur jam në Gjilan dhe ndihem i inkurajuar nga puna e mirë që keni bërë në bashkëqeverisje”.

Pacolli tha se për një kohë të gjatë e ka lënë anash punën dhe aktivitetet e AKR-së sepse ka dashur t`i përkushtohet Kosovës dhe interesave të qytetarëve të saj. “Mos harroni se Serbia po lobon në çdo kohë dhe gjithkah kundër njohjes së Kosovës. Dhe mos harroni se Kosovën nuk e kanë njohur disa shtete të vogla siç po thuhet , por e ka njohur më shumë se gjysma e botës. Tani shteti i Kosovës është njohur nga 100 shtete të botës. Kam ecur dhe vrapuar në 230 shtete të botës e të Afrikës. Afrika është interes strategjik i Kosovës sepse aty ka vende të punës dhe biznes” tha Pacolli.

Pacolli tha se tani ka nevojë të ndryshohet strategjia e lobimit dhe në të ardhmen nuk do të ketë nevojë për strategji intensive. “Tani kemi nevojë të lobojmë kah Kina e Rusia”. Derisa ka folur për njohjet dhe lobimin Pacolli tha se asnjë pagë apo honorar nuk e ka marrë nga buxheti i Kosovës. Të gjitha mjetet e shpenzuara janë paguar nga Fondacioni im” tha ai.

Duke folur për rolin AKR-së në Qeveri dhe në përgjithësi në Kosovë, Pacolli tha se në koalicion kemi hyrë për interesin e Kosovës dhe jo për shkak të dikujt tjetër.”Jemi Qeveria më e suksesshme që ka pasur ndonjëherë Kosova. Digasterët që ka drejtuar AKR-ja kanë dhënë rezultate dhe punë afirmative. Asnjë zyrtar i AKR-së apo ministri e AKR nuk është hetuar e as marrë në pyetje nga policia dhe kjo më bënë krenar”nënvizoi lideri i AKR-së.

Pacolli tha se në Qeveri do të jetë derisa të ketë nevojë dhe janë të gatshëm që të largohen nëse e kërkon nevoja. “Do të largohemi si duhet dhe qysh e donë rendi”. Për vitin 2013 tha se do të jetë vit i AKR-së pa i anashkaluar interesat e qytetarëve të Kosovës. “AKR ka dhënë kontributin e saj në bashkëqeverisje dhe kjo është e vërtetë. AKR është parti e ndershme dhe e pa korruptuar “tha Pacolli.

Pacolli u ka treguar elektoratit të AKR-së edhe letrat e Hasan Pretenit dhe tendencat që ta minimizojnë punën e tij. “Unë isha i pastër dhe kjo është e vërteta rreth atyre hetimeve tepër të panevojshme dhe të ulëta” tha Pacolli.

Kurse Omer Daku kryetar i degës së AKR-së në Gjilan tha se në Komunën e Gjilanit AKR ka tri drejtori të cilat shkëlqyeshëm po e menaxhojnë punën . “AKR ka mbrojtur interesin e qytetarit të Gjilanit duke treguar një imazh të mirë dhe shumë profesional”./rajonipress/

Shpërndaje.
© RAJONIPRESS