Pacolli i drejtohet Kurtit dhe Osmanit: Frenoni njerëzit tuaj, po më ofendojnë mua dhe fëmijët pa të drejtë

Kryetari i Aleancës Kosova e Re (AKR), Behgjet Pacolli, ka bërë të ditur se pas një deklarate të tij, ku përmendi bisedimet me ish-nënkryetarin e Listës Serbe, Milan Radoiçiq, është përballur me ofendime nga njerëz pranë kryeministrit Albin Kurti dhe presidentes Vjosa Osmani.

Pacolli kishte deklaruar se bisedoi me Radoiçiqin pas një kërkese nga Kurti dhe Osmani për të siguruar votat e Listës Serbe.

Të mërkurën ai i bëri thirrje Kurtit dhe Osmanit që të frenojnë njerëzit e tyre nga shpifjet dhe ofendimet.

“Nuk kam ndërmend të merrem me njerëzit tuaj, por kam një lutje: ju lutem frenoni njerëzit e juaj, ata që po më ofendojnë, sepse deklaratat e pavërteta që po bëjnë nuk po ofendojnë vetëm mua, por edhe fëmijët e mi,” ka thënë Pacolli.