Osmani e Anu Prattipati, flasin për ngërçin në Kuvend dhe bashkëpunimin Kosovë – SHBA

Presidentja e Kosovës, Vjosa Osmani, ka pritur sot në takim të Ngarkuarën me Punë të Ambasadës së Shteteve të Bashkuara të Amerikës në Kosovë, Anu Prattipati.

Takimi vjen një ditë pas pritjes zyrtare të organizuar nga ambasada amerikane në Prishtinë me rastin e Ditës së Pavarësisë së SHBA-ve.

Presidentja Osmani e ka uruar edhe një herë Prattipatin për këtë festë, në emër të qytetarëve të Republikës së Kosovës, duke ritheksuar mirënjohjen e thellë për mbështetjen e palëkundur të SHBA-ve ndër vite.

“Në takim u diskutuan zhvillimet e fundit në vend, me fokus të veçantë në ciklin e ri të konsultimeve me partitë politike lidhur me konstituimin e Kuvendit, në dritë të Aktgjykimit të Gjykatës Kushtetuese në rastin Nr.KO124/25,” thuhet në njoftimin e Zyrës së Presidencës.

Gjatë bisedës, Osmani dhe Prattipati folën edhe për çështje të tjera me interes të përbashkët në kuadër të bashkëpunimit bilateral, duke rikonfirmuar përkushtimin për avancimin e mëtejshëm të partneritetit strategjik ndërmjet Kosovës dhe Shteteve të Bashkuara të Amerikës.