Orekset për pushtet heqin vijat e kuqe

Më pak se gjashtë muaj para afatit kushtetues të zgjedhjeve lokale, partitë politike në Kosovë kanë filluar kalkulimet për koalicione me pretendimet për të marrë ose mbajtur edhe pushtetin qendror pas zgjedhjeve parlamentare.

Deri në zgjedhjet e fundit, përfaqësuesit e partive vendosnin vija të kuqe për subjekte të caktuara, por dëshira për të ardhur në pushtet i ka bërë tash ato vija, ura të mundshme bashkëpunimi mes tyre.

Lëvizja Vetëvendosje e udhëhequr nga Albin Kurti, e cila deri tani deklarohej hapur kundër bashkëpunimit me partitë politike që e mbështetën Planin e Ahtisarit, simbolet e Kosovës dhe Kushtetutën, tani ka dalë hapur se është e gatshme për të bashkëpunuar me subjektet që i kanë miratuar ato akte, vetëm për ta rrëzuar Hashim Thaçin nga pushteti.

Sinjalin për bashkëpunim me Vetëvendosjen e ka dhënë deputeti i LDK-së Arben Gashi, i cili ka thënë se koalicioni LDK-VV do të ishte i mundshëm për shkak se VV-ja ka ndryshuar kursin politik në dy vitet e fundit (Tribuna).