Opozita organizon “Muajin e mërgimtarëve”

Gjilan -Diasporës shqiptare nga komuna e Gjilanit, sivjet do t`i bëhet pritje si asnjëherë më parë, nga se pos organizimeve institucionale, të cilat fillojnë më 24 korrik dhe zgjasin një javë, program të veçantë për ta do të organizojë edhe subjekti më i madh opozitar në Gjilan, LDK-ja.

Lutfi Haziri, kryetar i degës, ka thënë se “Muaji i mërgimtarëve” do të zhvillohet në periudhën 24 korrik – 24 gusht dhe do të jetë i përmbushur me aktivitete të shumta, duke filluar nga debatet për rolin e diasporës për Kosovën, ekspozita të ndryshme nga jeta e tyre në perëndim dhe aktivitete tjera.

Ai i ka cilësuar mërgimtarët garantues të paqes sociale dhe të zhvillimit të vendit, ndërkohë që ka nënvizuar faktin se vetëm nga komuna e Gjilanit, në shtetet e perëndimit ndodhen 12 për qind të qytetarëve të saj, të cilët e kanë të rregulluar statusin e qëndrimit, pa i llogaritur ata pa leje qëndrimi.

Haziri ka kërkuar nga autoritetet komunale, që në aspektin e organizimit institucional, të përgatiten për të ofruar shërbime për mërgimtarët gjatë kohës sa ata qëndrojnë në Gjilan për pushime vjetore.

Përndryshe, Haziri ka përsëritur kërkesën e opozitës (LDK) për heqjen e kushtëzimeve për qytetarë, duke thënë se qeveria e ka bërë këtë në Mitrovicë, sepse janë vendime të kundërligjshme, ndërkohë që rikujtoi se varfëria në Kosova ka përfshirë 42 për qind të qytetarëve të saj.

Për më tepër, Haziri ka thënë se jeta në Kosovës është bërë e kushtëzuar për shumicën e qytetarëve të saj, ndërkohë që grupeve të caktuara u bëhen favore të ndryshme. /rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).