Opozita nuk lëshon pe, në tryezë vetëm nëse tërhiqen marrëveshjet

Pas takimit me presidenten e Kosovës, Atifete Jahjaga, tre liderët e Opozitës kanë thënë se në një tryezë me udhëheqësit e Qeverisë së Kosovës do të uleshin, vetëm në momentin kur do të tërhiqeshin marrëveshjet me Serbinë.

Kryetari i VV-së, Visar Ymeri, pas takimit me Presidenten ka theksuar edhe një herë se marrëveshjet e rëndojnë rëndë sovranitetin e Kosovës, raporton Telegrafi.

Veç kësaj, ai ka theksuar se çdo thirrje e seancës së Kuvendit në këto rrethana do të përshkallëzonte situatën në vend.

Liderët opozitarë gjithashtu u kanë bërë thirrje Prokurorisë dhe Policisë që mos të ndërmarrin hapa për “disiplinimin” e Opozitës.

Ndërkaq, pas takimit me Presidenten, partitë opozitare e kanë dërguar edhe një komunikatë për media.

Ja çfarë thuhet në të:

Kryetari i Lëvizjes VETËVENDOSJE!, z. Visar Ymeri, ai i Aleancës për Ardhmërinë e Kosovës, z. Ramush Haradinaj, dhe kryetari i Nismës për Kosovën, z. Fatmir Limaj, takuan sot Presidenten e Republikës së Kosovës, znj. Atifete Jahjaga. Ky takim ishte ftuar nga Presidentja.

Tre kryetarët e subjekteve politike ia paraqitën Presidentes kërkesat e Opozitës për tërheqje nga Marrëveshjet me Serbinë dhe nga ajo për demarkacionin me Malin e Zi, si kërkesa të cilat nuk kanë kompromis e as që janë të diskutueshme.

Po ashtu e njoftuan Presidenten se protesta e Opozitës së bashkuar në Kuvend dhe jashtë tij, nuk do të ndalet me asnjë kusht deri në realizimin e këtyre kërkesave.

Kryetarët e tre subjekteve shprehën kundërshtimin e tyre të fuqishëm për masat represive policore të cilat po i ndjek Qeveria me rrëmbimin e deputetëve dhe torturimin e aktivistëve të subjekteve opozitare me qëllim të frikësimit dhe ndaljes së protestës.

Vetëm tërheqja nga marrëveshjet e ndal protestën. Çkado tjetër dërgon në përshkallëzim të situatës. /Telegrafi/