Opozita kosovare, veç “një tigër prej letre”

Nga Fadil Maloku – 1. Opozita (LDK-ja dhe LV-ja, por jo edhe fraksioni i saj tash PSD-ja, që është bërë pjesë e qeverisë) me indiferencën, neglizhencën dhe sidomos me agresivitetin e saj të heshtur, në temat e karakterit nacional e shtetëror, lëre që e ka degraduar e shëmtuar diskursin dhe kultin mbi demokracinë e pluralizmin politik, por, edhe e ka vonuar (për të mos thënë bastarduar) nevojën e ndryshimit të “etheve” të tranzicionit nëpër të cilën po kalon Kosova, në këto dy dekada koti…!

2. Opozita me (argatët e djajve qeveritar të pasluftës) qëndrimin jokoherent në publik, me akuzat dhe kundërakuzat improvizuese, e joatraktive për temat, shqetësimet dhe mundimet jorelevante nëpër të cilat po i kalon vendi, jo vetëm që nuk po demonstron fuqi e karizmë të numrave (se e ka shumicën shqiptare pas veti), por, nuk po dëshmon as fuqi, e as sens e interesim për ta ndryshuar gjendjen shpërthyese; ekonomike e sociopolitike.

3. Duket që ajo këtë po e bënë qëllimisht dhe për disa arsye; a) ka vlerësuar (pa matje të duhura në publikun e gjerë) që temat si demarkacioni, gjykata, e sidomos tema e “korrigjimit” (lexo; copëtimit) është ajo “patatja e nxehtë” të cilën mund ta kryejnë vetëm akterët (alias komandantët) e luftës; b) ka nuhatur qartë gabimisht, se temat dhe problemet nacionale së bashku me ato shtetërore i takojnë ekskluzivisht qeverisë; c) ka nënvlerësuar dhe nënçmuar “peshën e vetë specifike” në raport me pakicën aktuale qeveritare; d) ka demonstruar deri më tani vetëm “fuqi tigri prej letre”, sidomos kur janë në pyetje krimi, korrupsioni, papunësia dhe varfëria marramendëse; e) ka kultivuar e ndërtuar atmosferë fatëpajtuese dhe koketuese me qeverinë (fraksioni i LV-së) në vend të një “agresiviteti” evident demokratik, në parlament në medie e pse jo edhe në rrugë; e) ka kalkuluar (duke mos u ofruar alternativa) me kurtuazi shëmtuese, me aleatë dhe miqtë ndërkombëtarë; f) ka injoruar trendët e pakënaqësisë sociale dhe ato ekonomike të vendit; g) ka margjinalizuar rolin dhe rëndësinë e shoqërisë civile dhe medieve neutrale…

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).